משלי - עם טעמים

בס''ד - כל הזכויות שמורות (c) ל J. Alan Groves Center - בתנאי רשיון CC-2.5

משלי - עם טעמים

א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא

משלי פרק-א

{א} מִ֭שְׁלֵי שְׁלֹמֹ֣ה בֶן-דָּוִ֑ד מֶ֝֗לֶךְ יִשְׂרָאֵֽל: {ב} לָדַ֣עַת חָכְמָ֣ה וּמוּסָ֑ר לְ֝הָבִ֗ין אִמְרֵ֥י בִינָֽה: {ג} לָ֭קַחַת מוּסַ֣ר הַשְׂכֵּ֑ל צֶ֥דֶק וּ֝מִשְׁפָּ֗ט וּמֵישָׁרִֽים: {ד} לָתֵ֣ת לִפְתָאיִ֣ם עָרְמָ֑ה לְ֝נַ֗עַר דַּ֣עַת וּמְזִמָּֽה: {ה} יִשְׁמַ֣ע חָ֭כָם וְי֣וֹסֶף לֶ֑קַח וְ֝נָב֗וֹן תַּחְבֻּל֥וֹת יִקְנֶֽה: {ו} לְהָבִ֣ין מָ֭שָׁל וּמְלִיצָ֑ה דִּבְרֵ֥י חֲ֝כָמִ֗ים וְחִידֹתָֽם: {ז} יִרְאַ֣ת יְ֭הוָה רֵאשִׁ֣ית דָּ֑עַת חָכְמָ֥ה וּ֝מוּסָ֗ר אֱוִילִ֥ים בָּֽזוּ: {ח} שְׁמַ֣ע בְּ֭נִי מוּסַ֣ר אָבִ֑יךָ וְאַל-תִּ֝טֹּ֗שׁ תּוֹרַ֥ת אִמֶּֽךָ: {ט} כִּ֤י | לִוְיַ֤ת חֵ֓ן הֵ֬ם לְרֹאשֶׁ֑ךָ וַ֝עֲנָקִ֗ים לְגַרְגְּרֹתֶֽיךָ: {י} בְּנִ֡י אִם-יְפַתּ֥וּךָ חַ֝טָּאִ֗ים אַל-תֹּבֵֽא: {יא} אִם-יֹאמְרוּ֮ לְכָ֪ה אִ֫תָּ֥נוּ נֶאֶרְבָ֥ה לְדָ֑ם נִצְפְּנָ֖ה לְנָקִ֣י חִנָּֽם: {יב} נִ֭בְלָעֵם כִּשְׁא֣וֹל חַיִּ֑ים וּ֝תְמִימִ֗ים כְּי֣וֹרְדֵי בֽוֹר: {יג} כָּל-ה֣וֹן יָקָ֣ר נִמְצָ֑א נְמַלֵּ֖א בָתֵּ֣ינוּ שָׁלָֽל: {יד} גּ֭וֹרָ֣לְךָ תַּפִּ֣יל בְּתוֹכֵ֑נוּ כִּ֥יס אֶ֝חָ֗ד יִהְיֶ֥ה לְכֻלָּֽנוּ: {טו} בְּנִ֗י אַל-תֵּלֵ֣ךְ בְּדֶ֣רֶךְ אִתָּ֑ם מְנַ֥ע רַ֝גְלְךָ֗ מִנְּתִיבָתָֽם: {טז} כִּ֣י רַ֭גְלֵיהֶם לָרַ֣ע יָר֑וּצוּ וִֽ֝ימַהֲר֗וּ לִשְׁפָּךְ-דָּֽם: {יז} כִּֽי-חִ֭נָּם מְזֹרָ֣ה הָרָ֑שֶׁת בְּ֝עֵינֵ֗י כָל-בַּ֥עַל כָּנָֽף: {יח} וְ֭הֵם לְדָמָ֣ם יֶאֱרֹ֑בוּ יִ֝צְפְּנ֗וּ לְנַפְשֹׁתָֽם: {יט} כֵּ֗ן אָ֭רְחוֹת כָּל-בֹּ֣צֵֽעַ בָּ֑צַע אֶת-נֶ֖פֶשׁ בְּעָלָ֣יו יִקָּֽח: {כ} חָ֭כְמוֹת בַּח֣וּץ תָּרֹ֑נָּה בָּ֝רְחֹב֗וֹת תִּתֵּ֥ן קוֹלָֽהּ: {כא} בְּרֹ֥אשׁ הֹמִיּ֗וֹת תִּ֫קְרָ֥א בְּפִתְחֵ֖י שְׁעָרִ֥ים בָּעִ֗יר אֲמָרֶ֥יהָ תֹאמֵֽר: {כב} עַד-מָתַ֣י | פְּתָיִם֮ תְּֽאֵהֲב֫וּ פֶ֥תִי וְלֵצִ֗ים לָ֭צוֹן חָמְד֣וּ לָהֶ֑ם וּ֝כְסִילִ֗ים יִשְׂנְאוּ-דָֽעַת: {כג} תָּשׁ֗וּבוּ לְֽת֫וֹכַחְתִּ֥י הִנֵּ֤ה אַבִּ֣יעָה לָכֶ֣ם רוּחִ֑י אוֹדִ֖יעָה דְבָרַ֣י אֶתְכֶֽם: {כד} יַ֣עַן קָ֭רָאתִי וַתְּמָאֵ֑נוּ נָטִ֥יתִי יָ֝דִ֗י וְאֵ֣ין מַקְשִֽׁיב: {כה} וַתִּפְרְע֥וּ כָל-עֲצָתִ֑י וְ֝תוֹכַחְתִּ֗י לֹ֣א אֲבִיתֶֽם: {כו} גַּם-אֲ֭נִי בְּאֵידְכֶ֣ם אֶשְׂחָ֑ק אֶ֝לְעַ֗ג בְּבֹ֣א פַחְדְּכֶֽם: {כז} בְּבֹ֤א (כשאוה) כְשׁוֹאָ֨ה | פַּחְדְּכֶ֗ם וְֽ֭אֵידְכֶם כְּסוּפָ֣ה יֶאֱתֶ֑ה בְּבֹ֥א עֲ֝לֵיכֶ֗ם צָרָ֥ה וְצוּקָֽה: {כח} אָ֣ז יִ֭קְרָאֻנְנִי וְלֹ֣א אֶֽעֱנֶ֑ה יְ֝שַׁחֲרֻ֗נְנִי וְלֹ֣א יִמְצָאֻֽנְנִי: {כט} תַּ֭חַת כִּי-שָׂ֣נְאוּ דָ֑עַת וְיִרְאַ֥ת יְ֝הוָֹ֗ה לֹ֣א בָחָֽרוּ: {ל} לֹא-אָב֥וּ לַעֲצָתִ֑י נָ֝אֲצ֗וּ כָּל-תּוֹכַחְתִּֽי: {לא} וְֽ֭יֹאכְלוּ מִפְּרִ֣י דַרְכָּ֑ם וּֽמִמֹּעֲצֹ֖תֵיהֶ֣ם יִשְׂבָּֽעוּ: {לב} כִּ֤י מְשׁוּבַ֣ת פְּתָיִ֣ם תַּֽהַרְגֵ֑ם וְשַׁלְוַ֖ת כְּסִילִ֣ים תְּאַבְּדֵֽם: {לג} וְשֹׁמֵ֣עַֽ לִ֭י יִשְׁכָּן-בֶּ֑טַח וְ֝שַׁאֲנַ֗ן מִפַּ֥חַד רָעָֽה:

משלי פרק-ב

{א} בְּ֭נִי אִם-תִּקַּ֣ח אֲמָרָ֑י וּ֝מִצְוֹתַ֗י תִּצְפֹּ֥ן אִתָּֽךְ: {ב} לְהַקְשִׁ֣יב לַֽחָכְמָ֣ה אָזְנֶ֑ךָ תַּטֶּ֥ה לִ֝בְּךָ֗ לַתְּבוּנָֽה: {ג} כִּ֤י אִ֣ם לַבִּינָ֣ה תִקְרָ֑א לַ֝תְּבוּנָ֗ה תִּתֵּ֥ן קוֹלֶֽךָ: {ד} אִם-תְּבַקְשֶׁ֥נָּה כַכָּ֑סֶף וְֽכַמַּטְמוֹנִ֥ים תַּחְפְּשֶֽׂנָּה: {ה} אָ֗ז תָּ֭בִין יִרְאַ֣ת יְהוָ֑ה וְדַ֖עַת אֱלֹהִ֣ים תִּמְצָֽא: {ו} כִּֽי-יְ֭הוָה יִתֵּ֣ן חָכְמָ֑ה מִ֝פִּ֗יו דַּ֣עַת וּתְבוּנָֽה: {ז} (וצפן) יִצְפֹּ֣ן לַ֭יְשָׁרִים תּוּשִׁיָּ֑ה מָ֝גֵ֗ן לְהֹ֣לְכֵי תֹֽם: {ח} לִ֭נְצֹר אָרְח֣וֹת מִשְׁפָּ֑ט וְדֶ֖רֶךְ (חסידו) חֲסִידָ֣יו יִשְׁמֹֽר: {ט} אָ֗ז תָּ֭בִין צֶ֣דֶק וּמִשְׁפָּ֑ט וּ֝מֵישָׁרִ֗ים כָּל-מַעְגַּל-טֽוֹב: {י} כִּֽי-תָב֣וֹא חָכְמָ֣ה בְלִבֶּ֑ךָ וְ֝דַ֗עַת לְֽנַפְשְׁךָ֥ יִנְעָֽם: {יא} מְ֭זִמָּה תִּשְׁמֹ֥ר עָלֶ֗יךָ תְּבוּנָ֥ה תִנְצְרֶֽכָּה: {יב} לְ֭הַצִּ֣ילְךָ מִדֶּ֣רֶךְ רָ֑ע מֵ֝אִ֗ישׁ מְדַבֵּ֥ר תַּהְפֻּכֽוֹת: {יג} הַ֭עֹ֣זְבִים אָרְח֣וֹת יֹ֑שֶׁר לָ֝לֶ֗כֶת בְּדַרְכֵי-חֹֽשֶׁךְ: {יד} הַ֭שְּׂמֵחִים לַעֲשׂ֥וֹת רָ֑ע יָ֝גִ֗ילוּ בְּֽתַהְפֻּכ֥וֹת רָֽע: {טו} אֲשֶׁ֣ר אָרְחֹתֵיהֶ֣ם עִקְּשִׁ֑ים וּ֝נְלוֹזִ֗ים בְּמַעְגְּלוֹתָֽם: {טז} לְ֭הַצִּ֣ילְךָ מֵאִשָּׁ֣ה זָרָ֑ה מִ֝נָּכְרִיָּ֗ה אֲמָרֶ֥יהָ הֶחֱלִֽיקָה: {יז} הַ֭עֹזֶבֶת אַלּ֣וּף נְעוּרֶ֑יהָ וְאֶת-בְּרִ֖ית אֱלֹהֶ֣יהָ שָׁכֵֽחָה: {יח} כִּ֤י שָׁ֣חָה אֶל-מָ֣וֶת בֵּיתָ֑הּ וְאֶל-רְ֝פָאִ֗ים מַעְגְּלֹתֶֽיהָ: {יט} כָּל-בָּ֭אֶיהָ לֹ֣א יְשׁוּב֑וּן וְלֹֽא-יַ֝שִּׂ֗יגוּ אָרְח֥וֹת חַיִּֽים: {כ} לְמַ֗עַן תֵּ֭לֵךְ בְּדֶ֣רֶךְ טוֹבִ֑ים וְאָרְח֖וֹת צַדִּיקִ֣ים תִּשְׁמֹֽר: {כא} כִּֽי-יְשָׁרִ֥ים יִשְׁכְּנוּ-אָ֑רֶץ וּ֝תְמִימִ֗ים יִוָּ֥תְרוּ בָֽהּ: {כב} וּ֭רְשָׁעִים מֵאֶ֣רֶץ יִכָּרֵ֑תוּ וּ֝בוֹגְדִ֗ים יִסְּח֥וּ מִמֶּֽנָּה:

משלי פרק-ג

{א} בְּ֭נִי תּוֹרָתִ֣י אַל-תִּשְׁכָּ֑ח וּ֝מִצְוֹתַ֗י יִצֹּ֥ר לִבֶּֽךָ: {ב} כִּ֤י אֹ֣רֶךְ יָ֭מִים וּשְׁנ֣וֹת חַיִּ֑ים וְ֝שָׁל֗וֹם יוֹסִ֥יפוּ לָֽךְ: {ג} חֶ֥סֶד וֶאֱמֶ֗ת אַֽל-יַעַ֫זְבֻ֥ךָ קָשְׁרֵ֥ם עַל-גַּרְגְּרוֹתֶ֑יךָ כָּ֝תְבֵ֗ם עַל-ל֥וּחַ לִבֶּֽךָ: {ד} וּמְצָא-חֵ֖ן וְשֵֽׂכֶל-ט֑וֹב בְּעֵינֵ֖י אֱלֹהִ֣ים וְאָדָֽם: {ה} בְּטַ֣ח אֶל-יְ֭הוָה בְּכָל-לִבֶּ֑ךָ וְאֶל-בִּֽ֝ינָתְךָ֗ אַל-תִּשָּׁעֵֽן: {ו} בְּכָל-דְּרָכֶ֥יךָ דָעֵ֑הוּ וְ֝ה֗וּא יְיַשֵּׁ֥ר אֹֽרְחֹתֶֽיךָ: {ז} אַל-תְּהִ֣י חָכָ֣ם בְּעֵינֶ֑יךָ יְרָ֥א אֶת-יְ֝הוָ֗ה וְס֣וּר מֵרָֽע: {ח} רִ֭פְאוּת תְּהִ֣י לְשָׁרֶּ֑ךָ וְ֝שִׁקּ֗וּי לְעַצְמוֹתֶֽיךָ: {ט} כַּבֵּ֣ד אֶת-יְ֭הוָה מֵהוֹנֶ֑ךָ וּ֝מֵרֵאשִׁ֗ית כָּל-תְּבוּאָתֶֽךָ: {י} וְיִמָּלְא֣וּ אֲסָמֶ֣יךָ שָׂבָ֑ע וְ֝תִיר֗וֹשׁ יְקָבֶ֥יךָ יִפְרֹֽצוּ: {יא} מוּסַ֣ר יְ֭הוָה בְּנִ֣י אַל-תִּמְאָ֑ס וְאַל-תָּ֝קֹ֗ץ בְּתוֹכַחְתּֽוֹ: {יב} כִּ֤י אֶ֥ת אֲשֶׁ֣ר יֶאֱהַ֣ב יְהוָ֣ה יוֹכִ֑יחַ וּ֝כְאָ֗ב אֶת-בֵּ֥ן יִרְצֶֽה: {יג} אַשְׁרֵ֣י אָ֭דָם מָצָ֣א חָכְמָ֑ה וְ֝אָדָ֗ם יָפִ֥יק תְּבוּנָֽה: {יד} כִּ֤י ט֣וֹב סַ֭חְרָהּ מִסְּחַר-כָּ֑סֶף וּ֝מֵחָר֗וּץ תְּבוּאָתָֽהּ: {טו} יְקָ֣רָה הִ֭יא (מפניים) מִפְּנִינִ֑ים וְכָל-חֲ֝פָצֶ֗יךָ לֹ֣א יִֽשְׁווּ-בָֽהּ: {טז} אֹ֣רֶךְ יָ֭מִים בִּֽימִינָ֑הּ בִּ֝שְׂמֹאולָ֗הּ עֹ֣שֶׁר וְכָבֽוֹד: {יז} דְּרָכֶ֥יהָ דַרְכֵי-נֹ֑עַם וְֽכָל-נְתִ֖יבוֹתֶ֣יהָ שָׁלֽוֹם: {יח} עֵץ-חַיִּ֣ים הִ֭יא לַמַּחֲזִיקִ֣ים בָּ֑הּ וְֽתֹמְכֶ֥יהָ מְאֻשָּֽׁר: {יט} יְֽהוָ֗ה בְּחָכְמָ֥ה יָֽסַד-אָ֑רֶץ כּוֹנֵ֥ן שָׁ֝מַ֗יִם בִּתְבוּנָֽה: {כ} בְּ֭דַעְתּוֹ תְּהוֹמ֣וֹת נִבְקָ֑עוּ וּ֝שְׁחָקִ֗ים יִרְעֲפוּ-טָֽל: {כא} בְּ֭נִי אַל-יָלֻ֣זוּ מֵעֵינֶ֑יךָ נְצֹ֥ר תֻּ֝שִׁיָּ֗ה וּמְזִמָּֽה: {כב} וְיִֽהְי֣וּ חַיִּ֣ים לְנַפְשֶׁ֑ךָ וְ֝חֵ֗ן לְגַרְגְּרֹתֶֽיךָ: {כג} אָ֤ז תֵּלֵ֣ךְ לָבֶ֣טַח דַּרְכֶּ֑ךָ וְ֝רַגְלְךָ֗ לֹ֣א תִגּֽוֹף: {כד} אִם-תִּשְׁכַּ֥ב לֹֽא-תִפְחָ֑ד וְ֝שָׁכַבְתָּ֗ וְֽעָרְבָ֥ה שְׁנָתֶֽךָ: {כה} אַל-תִּ֭ירָא מִפַּ֣חַד פִּתְאֹ֑ם וּמִשֹּׁאַ֥ת רְ֝שָׁעִ֗ים כִּ֣י תָבֹֽא: {כו} כִּֽי-יְ֭הוָה יִהְיֶ֣ה בְכִסְלֶ֑ךָ וְשָׁמַ֖ר רַגְלְךָ֣ מִלָּֽכֶד: {כז} אַל-תִּמְנַע-ט֥וֹב מִבְּעָלָ֑יו בִּהְי֨וֹת לְאֵ֖ל (ידיך) יָדְךָ֣ לַעֲשֽׂוֹת: {כח} אַל-תֹּ֘אמַ֤ר (לרעיך) לְרֵֽעֲךָ֨ | לֵ֣ךְ וָ֭שׁוּב וּמָחָ֥ר אֶתֵּ֗ן וְיֵ֣שׁ אִתָּֽךְ: {כט} אַל-תַּחֲרֹ֣שׁ עַל-רֵעֲךָ֣ רָעָ֑ה וְהֽוּא-יוֹשֵׁ֖ב לָבֶ֣טַח אִתָּֽךְ: {ל} אַל-(תרוב) תָּרִ֣יב עִם-אָדָ֣ם חִנָּ֑ם אִם-לֹ֖א גְמָלְךָ֣ רָעָֽה: {לא} אַל-תְּ֭קַנֵּא בְּאִ֣ישׁ חָמָ֑ס וְאַל-תִּ֝בְחַ֗ר בְּכָל-דְּרָכָֽיו: {לב} כִּ֤י תוֹעֲבַ֣ת יְהוָ֣ה נָל֑וֹז וְֽאֶת-יְשָׁרִ֥ים סוֹדֽוֹ: {לג} מְאֵרַ֣ת יְ֭הוָה בְּבֵ֣ית רָשָׁ֑ע וּנְוֵ֖ה צַדִּיקִ֣ים יְבָרֵֽךְ: {לד} אִם-לַלֵּצִ֥ים הֽוּא-יָלִ֑יץ (ולעניים) וְ֝לַעֲנָוִ֗ים יִתֶּן-חֵֽן: {לה} כָּ֭בוֹד חֲכָמִ֣ים יִנְחָ֑לוּ וּ֝כְסִילִ֗ים מֵרִ֥ים קָלֽוֹן:

משלי פרק-ד

{א} שִׁמְע֣וּ בָ֭נִים מ֣וּסַר אָ֑ב וְ֝הַקְשִׁ֗יבוּ לָדַ֥עַת בִּינָֽה: {ב} כִּ֤י לֶ֣קַח ט֭וֹב נָתַ֣תִּי לָכֶ֑ם תּֽ֝וֹרָתִ֗י אַֽל-תַּעֲזֹֽבוּ: {ג} כִּי-בֵ֭ן הָיִ֣יתִי לְאָבִ֑י רַ֥ךְ וְ֝יָחִ֗יד לִפְנֵ֥י אִמִּֽי: {ד} וַיֹּרֵ֗נִי וַיֹּ֥אמֶר לִ֗י יִֽתְמָךְ-דְּבָרַ֥י לִבֶּ֑ךָ שְׁמֹ֖ר מִצְוֹתַ֣י וֶֽחְיֵֽה: {ה} קְנֵ֣ה חָ֭כְמָה קְנֵ֣ה בִינָ֑ה אַל-תִּשְׁכַּ֥ח וְאַל-תֵּ֝֗ט מֵֽאִמְרֵי-פִֽי: {ו} אַל-תַּעַזְבֶ֥הָ וְתִשְׁמְרֶ֑ךָּ אֱהָבֶ֥הָ וְתִצְּרֶֽךָּ: {ז} רֵאשִׁ֣ית חָ֭כְמָה קְנֵ֣ה חָכְמָ֑ה וּבְכָל-קִ֝נְיָנְךָ֗ קְנֵ֣ה בִינָֽה: {ח} סַלְסְלֶ֥הָ וּֽתְרוֹמְמֶ֑ךָּ תְּ֝כַבֵּ֗דְךָ כִּ֣י תְחַבְּקֶֽנָּה: {ט} תִּתֵּ֣ן לְ֭רֹאשְׁךָ לִוְיַת-חֵ֑ן עֲטֶ֖רֶת תִּפְאֶ֣רֶת תְּמַגְּנֶֽךָּ: {י} שְׁמַ֣ע בְּ֭נִי וְקַ֣ח אֲמָרָ֑י וְיִרְבּ֥וּ לְ֝ךָ֗ שְׁנ֣וֹת חַיִּֽים: {יא} בְּדֶ֣רֶךְ חָ֭כְמָה הֹרֵתִ֑יךָ הִ֝דְרַכְתִּ֗יךָ בְּמַעְגְּלֵי-יֹֽשֶׁר: {יב} בְּֽ֭לֶכְתְּךָ לֹא-יֵצַ֣ר צַעֲדֶ֑ךָ וְאִם-תָּ֝ר֗וּץ לֹ֣א תִכָּשֵֽׁל: {יג} הַחֲזֵ֣ק בַּמּוּסָ֣ר אַל-תֶּ֑רֶף נִ֝צְּרֶ֗הָ כִּי-הִ֥יא חַיֶּֽיךָ: {יד} בְּאֹ֣רַח רְ֭שָׁעִים אַל-תָּבֹ֑א וְאַל-תְּ֝אַשֵּׁ֗ר בְּדֶ֣רֶךְ רָעִֽים: {טו} פְּרָעֵ֥הוּ אַל-תַּעֲבָר-בּ֑וֹ שְׂטֵ֖ה מֵעָלָ֣יו וַעֲבֽוֹר: {טז} כִּ֤י לֹ֣א יִֽ֭שְׁנוּ אִם-לֹ֣א יָרֵ֑עוּ וְֽנִגְזְלָ֥ה שְׁ֝נָתָ֗ם אִם-לֹ֥א (יכשולו) יַכְשִֽׁילוּ: {יז} כִּ֣י לָ֭חֲמוּ לֶ֣חֶם רֶ֑שַׁע וְיֵ֖ין חֲמָסִ֣ים יִשְׁתּֽוּ: {יח} וְאֹ֣רַח צַ֭דִּיקִים כְּא֣וֹר נֹ֑גַהּ הוֹלֵ֥ךְ וָ֝א֗וֹר עַד-נְכ֥וֹן הַיּֽוֹם: {יט} דֶּ֣רֶךְ רְ֭שָׁעִים כָּֽאֲפֵלָ֑ה לֹ֥א יָ֝דְע֗וּ בַּמֶּ֥ה יִכָּשֵֽׁלוּ: {כ} בְּ֭נִי לִדְבָרַ֣י הַקְשִׁ֑יבָה לַ֝אֲמָרַ֗י הַט-אָזְנֶֽךָ: {כא} אַל-יַלִּ֥יזוּ מֵעֵינֶ֑יךָ שָׁ֝מְרֵ֗ם בְּת֣וֹךְ לְבָבֶֽךָ: {כב} כִּֽי-חַיִּ֣ים הֵ֭ם לְמֹצְאֵיהֶ֑ם וּֽלְכָל-בְּשָׂר֥וֹ מַרְפֵּֽא: {כג} מִֽכָּל-מִ֭שְׁמָר נְצֹ֣ר לִבֶּ֑ךָ כִּֽי-מִ֝מֶּ֗נּוּ תּוֹצְא֥וֹת חַיִּֽים: {כד} הָסֵ֣ר מִ֭מְּךָ עִקְּשׁ֣וּת פֶּ֑ה וּלְז֥וּת שְׂ֝פָתַ֗יִם הַרְחֵ֥ק מִמֶּֽךָּ: {כה} עֵ֭ינֶיךָ לְנֹ֣כַח יַבִּ֑יטוּ וְ֝עַפְעַפֶּ֗יךָ יַיְשִׁ֥רוּ נֶגְדֶּֽךָ: {כו} פַּ֭לֵּס מַעְגַּ֣ל רַגְלֶ֑ךָ וְֽכָל-דְּרָכֶ֥יךָ יִכֹּֽנוּ: {כז} אַֽל-תֵּט-יָמִ֥ין וּשְׂמֹ֑אול הָסֵ֖ר רַגְלְךָ֣ מֵרָֽע:

משלי פרק-ה

{א} בְּ֭נִי לְחָכְמָתִ֣י הַקְשִׁ֑יבָה לִ֝תְבוּנָתִ֗י הַט-אָזְנֶֽךָ: {ב} לִשְׁמֹ֥ר מְזִמּ֑וֹת וְ֝דַ֗עַת שְׂפָתֶ֥יךָ יִנְצֹֽרוּ: {ג} כִּ֤י נֹ֣פֶת תִּ֭טֹּפְנָה שִׂפְתֵ֣י זָרָ֑ה וְחָלָ֖ק מִשֶּׁ֣מֶן חִכָּֽהּ: {ד} וְֽ֭אַחֲרִיתָהּ מָרָ֣ה כַֽלַּעֲנָ֑ה חַ֝דָּ֗ה כְּחֶ֣רֶב פִּיּֽוֹת: {ה} רַ֭גְלֶיהָ יֹרְד֣וֹת מָ֑וֶת שְׁ֝א֗וֹל צְעָדֶ֥יהָ יִתְמֹֽכוּ: {ו} אֹ֣רַח חַ֭יִּים פֶּן-תְּפַלֵּ֑ס נָע֥וּ מַ֝עְגְּלֹתֶ֗יהָ לֹ֣א תֵדָֽע: {ז} וְעַתָּ֣ה בָ֭נִים שִׁמְעוּ-לִ֑י וְאַל-תָּ֝ס֗וּרוּ מֵאִמְרֵי-פִֽי: {ח} הַרְחֵ֣ק מֵעָלֶ֣יהָ דַרְכֶּ֑ךָ וְאַל-תִּ֝קְרַ֗ב אֶל-פֶּ֥תַח בֵּיתָֽהּ: {ט} פֶּן-תִּתֵּ֣ן לַאֲחֵרִ֣ים הוֹדֶ֑ךָ וּ֝שְׁנֹתֶ֗יךָ לְאַכְזָרִֽי: {י} פֶּֽן-יִשְׂבְּע֣וּ זָרִ֣ים כֹּחֶ֑ךָ וַ֝עֲצָבֶ֗יךָ בְּבֵ֣ית נָכְרִֽי: {יא} וְנָהַמְתָּ֥ בְאַחֲרִיתֶ֑ךָ בִּכְל֥וֹת בְּ֝שָׂרְךָ֗ וּשְׁאֵרֶֽךָ: {יב} וְֽאָמַרְתָּ֗ אֵ֭יךְ שָׂנֵ֣אתִי מוּסָ֑ר וְ֝תוֹכַ֗חַת נָאַ֥ץ לִבִּֽי: {יג} וְֽלֹא-שָׁ֭מַעְתִּי בְּק֣וֹל מוֹרָ֑י וְ֝לִֽמְלַמְּדַ֗י לֹא-הִטִּ֥יתִי אָזְנִֽי: {יד} כִּ֭מְעַט הָיִ֣יתִי בְכָל-רָ֑ע בְּת֖וֹךְ קָהָ֣ל וְעֵדָֽה: {טו} שְׁתֵה-מַ֥יִם מִבּוֹרֶ֑ךָ וְ֝נֹזְלִ֗ים מִתּ֥וֹךְ בְּאֵרֶֽךָ: {טז} יָפ֣וּצוּ מַעְיְנֹתֶ֣יךָ ח֑וּצָה בָּ֝רְחֹב֗וֹת פַּלְגֵי-מָֽיִם: {יז} יִֽהְיוּ-לְךָ֥ לְבַדֶּ֑ךָ וְאֵ֖ין לְזָרִ֣ים אִתָּֽךְ: {יח} יְהִֽי-מְקוֹרְךָ֥ בָר֑וּךְ וּ֝שְׂמַ֗ח מֵאֵ֥שֶׁת נְעוּרֶֽךָ: {יט} אַיֶּ֥לֶת אֲהָבִ֗ים וְֽיַעֲלַ֫ת-חֵ֥ן דַּ֭דֶּיהָ יְרַוֻּ֣ךָ בְכָל-עֵ֑ת בְּ֝אַהֲבָתָ֗הּ תִּשְׁגֶּ֥ה תָמִֽיד: {כ} וְלָ֤מָּה תִשְׁגֶּ֣ה בְנִ֣י בְזָרָ֑ה וּ֝תְחַבֵּ֗ק חֵ֣ק נָכְרִיָּֽה: {כא} כִּ֤י נֹ֨כַח | עֵינֵ֣י יְ֭הוָה דַּרְכֵי-אִ֑ישׁ וְֽכָל-מַעְגְּלֹתָ֥יו מְפַלֵּֽס: {כב} עַֽווֹנוֹתָ֗יו יִלְכְּדֻנ֥וֹ אֶת-הָרָשָׁ֑ע וּבְחַבְלֵ֥י חַ֝טָּאת֗וֹ יִתָּמֵֽךְ: {כג} ה֗וּא יָ֭מוּת בְּאֵ֣ין מוּסָ֑ר וּבְרֹ֖ב אִוַּלְתּ֣וֹ יִשְׁגֶּֽה:

משלי פרק-ו

{א} בְּ֭נִי אִם-עָרַ֣בְתָּ לְרֵעֶ֑ךָ תָּקַ֖עְתָּ לַזָּ֣ר כַּפֶּֽיךָ: {ב} נוֹקַ֥שְׁתָּ בְאִמְרֵי-פִ֑יךָ נִ֝לְכַּ֗דְתָּ בְּאִמְרֵי-פִֽיךָ: {ג} עֲשֵׂ֨ה זֹ֥את אֵפ֪וֹא | בְּנִ֡י וְֽהִנָּצֵ֗ל כִּ֘י בָ֤אתָ בְכַף-רֵעֶ֑ךָ לֵ֥ךְ הִ֝תְרַפֵּ֗ס וּרְהַ֥ב רֵעֶֽיךָ: {ד} אַל-תִּתֵּ֣ן שֵׁנָ֣ה לְעֵינֶ֑יךָ וּ֝תְנוּמָ֗ה לְעַפְעַפֶּֽיךָ: {ה} הִ֭נָּצֵל כִּצְבִ֣י מִיָּ֑ד וּ֝כְצִפּ֗וֹר מִיַּ֥ד יָקֽוּשׁ: {ו} לֵֽךְ-אֶל-נְמָלָ֥ה עָצֵ֑ל רְאֵ֖ה דְרָכֶ֣יהָ וַחֲכָֽם: {ז} אֲשֶׁ֖ר אֵֽין-לָ֥הּ קָצִ֗ין שֹׁטֵ֥ר וּמֹשֵֽׁל: {ח} תָּכִ֣ין בַּקַּ֣יִץ לַחְמָ֑הּ אָגְרָ֥ה בַ֝קָּצִ֗יר מַאֲכָלָֽהּ: {ט} עַד-מָתַ֖י עָצֵ֥ל | תִּשְׁכָּ֑ב מָ֝תַ֗י תָּק֥וּם מִשְּׁנָתֶֽךָ: {י} מְעַ֣ט שֵׁ֭נוֹת מְעַ֣ט תְּנוּמ֑וֹת מְעַ֓ט | חִבֻּ֖ק יָדַ֣יִם לִשְׁכָּֽב: {יא} וּבָֽא-כִמְהַלֵּ֥ךְ רֵאשֶׁ֑ךָ וּ֝מַחְסֹֽרְךָ֗ כְּאִ֣ישׁ מָגֵֽן: {יב} אָדָ֣ם בְּ֭לִיַּעַל אִ֣ישׁ אָ֑וֶן ה֝וֹלֵ֗ךְ עִקְּשׁ֥וּת פֶּֽה: {יג} קֹרֵ֣ץ בְּ֭עֵינָיו מֹלֵ֣ל בְּרַגְלָ֑ו מֹ֝רֶ֗ה בְּאֶצְבְּעֹתָֽיו: {יד} תַּֽהְפֻּכ֨וֹת | בְּלִבּ֗וֹ חֹרֵ֣שׁ רָ֣ע בְּכָל-עֵ֑ת (מדנים) מִדְיָנִ֥ים יְשַׁלֵּֽחַ: {טו} עַל-כֵּ֗ן פִּ֭תְאֹם יָב֣וֹא אֵיד֑וֹ פֶּ֥תַע יִ֝שָּׁבֵ֗ר וְאֵ֣ין מַרְפֵּֽא: {טז} שֶׁשׁ-הֵ֭נָּה שָׂנֵ֣א יְהוָ֑ה וְ֝שֶׁ֗בַע (תועבות) תּוֹעֲבַ֥ת נַפְשֽׁוֹ: {יז} עֵינַ֣יִם רָ֭מוֹת לְשׁ֣וֹן שָׁ֑קֶר וְ֝יָדַ֗יִם שֹׁפְכ֥וֹת דָּם-נָקִֽי: {יח} לֵ֗ב חֹ֭רֵשׁ מַחְשְׁב֣וֹת אָ֑וֶן רַגְלַ֥יִם מְ֝מַהֲר֗וֹת לָר֥וּץ לָֽרָעָה: {יט} יָפִ֣יחַ כְּ֭זָבִים עֵ֣ד שָׁ֑קֶר וּמְשַׁלֵּ֥חַ מְ֝דָנִ֗ים בֵּ֣ין אַחִֽים: {כ} נְצֹ֣ר בְּ֭נִי מִצְוַ֣ת אָבִ֑יךָ וְאַל-תִּ֝טֹּ֗שׁ תּוֹרַ֥ת אִמֶּֽךָ: {כא} קָשְׁרֵ֣ם עַל-לִבְּךָ֣ תָמִ֑יד עָ֝נְדֵ֗ם עַל-גַּרְגְּרֹתֶֽךָ: {כב} בְּהִתְהַלֶּכְךָ֨ | תַּנְחֶ֬ה אֹתָ֗ךְ בְּֽ֭שָׁכְבְּךָ תִּשְׁמֹ֣ר עָלֶ֑יךָ וַ֝הֲקִיצ֗וֹתָ הִ֣יא תְשִׂיחֶֽךָ: {כג} כִּ֤י נֵ֣ר מִ֭צְוָה וְת֣וֹרָה א֑וֹר וְדֶ֥רֶךְ חַ֝יִּ֗ים תּוֹכְח֥וֹת מוּסָֽר: {כד} לִ֭שְׁמָרְךָ מֵאֵ֣שֶׁת רָ֑ע מֵֽ֝חֶלְקַ֗ת לָשׁ֥וֹן נָכְרִיָּֽה: {כה} אַל-תַּחְמֹ֣ד יָ֭פְיָהּ בִּלְבָבֶ֑ךָ וְאַל-תִּ֝קָּֽחֲךָ֗ בְּעַפְעַפֶּֽיהָ: {כו} כִּ֤י בְעַד-אִשָּׁ֥ה זוֹנָ֗ה עַֽד-כִּכַּ֫ר לָ֥חֶם וְאֵ֥שֶׁת אִ֑ישׁ נֶ֖פֶשׁ יְקָרָ֣ה תָצֽוּד: {כז} הֲיַחְתֶּ֤ה אִ֓ישׁ אֵ֬שׁ בְּחֵיק֑וֹ וּ֝בְגָדָ֗יו לֹ֣א תִשָּׂרַֽפְנָה: {כח} אִם-יְהַלֵּ֣ךְ אִ֭ישׁ עַל-הַגֶּחָלִ֑ים וְ֝רַגְלָ֗יו לֹ֣א תִכָּוֶֽינָה: {כט} כֵּ֗ן הַ֭בָּא אֶל-אֵ֣שֶׁת רֵעֵ֑הוּ לֹ֥א יִ֝נָּקֶ֗ה כָּֽל-הַנֹּגֵ֥עַ בָּֽהּ: {ל} לֹא-יָב֣וּזוּ לַ֭גַּנָּב כִּ֣י יִגְנ֑וֹב לְמַלֵּ֥א נַ֝פְשׁ֗וֹ כִּ֣י יִרְעָֽב: {לא} וְ֭נִמְצָא יְשַׁלֵּ֣ם שִׁבְעָתָ֑יִם אֶת-כָּל-ה֖וֹן בֵּית֣וֹ יִתֵּֽן: {לב} נֹאֵ֣ף אִשָּׁ֣ה חֲסַר-לֵ֑ב מַֽשְׁחִ֥ית נַ֝פְשׁ֗וֹ ה֣וּא יַעֲשֶֽׂנָּה: {לג} נֶֽגַע-וְקָל֥וֹן יִמְצָ֑א וְ֝חֶרְפָּת֗וֹ לֹ֣א תִמָּחֶֽה: {לד} כִּֽי-קִנְאָ֥ה חֲמַת-גָּ֑בֶר וְלֹֽא-יַ֝חְמ֗וֹל בְּי֣וֹם נָקָֽם: {לה} לֹא-יִ֭שָּׂא פְּנֵ֣י כָל-כֹּ֑פֶר וְלֹֽא-יֹ֝אבֶ֗ה כִּ֣י תַרְבֶּה-שֹֽׁחַד:

משלי פרק-ז

{א} בְּ֭נִי שְׁמֹ֣ר אֲמָרָ֑י וּ֝מִצְוֹתַ֗י תִּצְפֹּ֥ן אִתָּֽךְ: {ב} שְׁמֹ֣ר מִצְוֹתַ֣י וֶחְיֵ֑ה וְ֝תוֹרָתִ֗י כְּאִישׁ֥וֹן עֵינֶֽיךָ: {ג} קָשְׁרֵ֥ם עַל-אֶצְבְּעֹתֶ֑יךָ כָּ֝תְבֵ֗ם עַל-ל֥וּחַ לִבֶּֽךָ: {ד} אֱמֹ֣ר לַֽ֭חָכְמָה אֲחֹ֣תִי אָ֑תְּ וּ֝מֹדָ֗ע לַבִּינָ֥ה תִקְרָֽא: {ה} לִ֭שְׁמָרְךָ מֵאִשָּׁ֣ה זָרָ֑ה מִ֝נָּכְרִיָּ֗ה אֲמָרֶ֥יהָ הֶחֱלִֽיקָה: {ו} כִּ֭י בְּחַלּ֣וֹן בֵּיתִ֑י בְּעַ֖ד אֶשְׁנַבִּ֣י נִשְׁקָֽפְתִּי: {ז} וָאֵ֤רֶא בַפְּתָאיִ֗ם אָ֘בִ֤ינָה בַבָּנִ֗ים נַ֣עַר חֲסַר-לֵֽב: {ח} עֹבֵ֣ר בַּ֭שּׁוּק אֵ֣צֶל פִּנָּ֑הּ וְדֶ֖רֶךְ בֵּיתָ֣הּ יִצְעָֽד: {ט} בְּנֶֽשֶׁף-בְּעֶ֥רֶב י֑וֹם בְּאִישׁ֥וֹן לַ֝֗יְלָה וַאֲפֵלָֽה: {י} וְהִנֵּ֣ה אִ֭שָּׁה לִקְרָאת֑וֹ שִׁ֥ית ז֝וֹנָ֗ה וּנְצֻ֥רַת לֵֽב: {יא} הֹמִיָּ֣ה הִ֣יא וְסֹרָ֑רֶת בְּ֝בֵיתָ֗הּ לֹא-יִשְׁכְּנ֥וּ רַגְלֶֽיהָ: {יב} פַּ֤עַם | בַּח֗וּץ פַּ֥עַם בָּרְחֹב֑וֹת וְאֵ֖צֶל כָּל-פִּנָּ֣ה תֶאֱרֹֽב: {יג} וְהֶחֱזִ֣יקָה בּ֖וֹ וְנָ֣שְׁקָה-לּ֑וֹ הֵעֵ֥זָה פָ֝נֶ֗יהָ וַתֹּ֣אמַר לֽוֹ: {יד} זִבְחֵ֣י שְׁלָמִ֣ים עָלָ֑י הַ֝יּ֗וֹם שִׁלַּ֥מְתִּי נְדָרָֽי: {טו} עַל-כֵּ֭ן יָצָ֣אתִי לִקְרָאתֶ֑ךָ לְשַׁחֵ֥ר פָּ֝נֶ֗יךָ וָאֶמְצָאֶֽךָּ: {טז} מַ֭רְבַדִּים רָבַ֣דְתִּי עַרְשִׂ֑י חֲ֝טֻב֗וֹת אֵט֥וּן מִצְרָֽיִם: {יז} נַ֥פְתִּי מִשְׁכָּבִ֑י מֹ֥ר אֲ֝הָלִ֗ים וְקִנָּמֽוֹן: {יח} לְכָ֤ה נִרְוֶ֣ה דֹ֭דִים עַד-הַבֹּ֑קֶר נִ֝תְעַלְּסָ֗ה בָּאֳהָבִֽים: {יט} כִּ֤י אֵ֣ין הָאִ֣ישׁ בְּבֵית֑וֹ הָ֝לַ֗ךְ בְּדֶ֣רֶךְ מֵרָחֽוֹק: {כ} צְֽרוֹר-הַ֭כֶּסֶף לָקַ֣ח בְּיָד֑וֹ לְי֥וֹם הַ֝כֵּ֗סֶא יָבֹ֥א בֵיתֽוֹ: {כא} הִ֭טַּתּוּ בְּרֹ֣ב לִקְחָ֑הּ בְּחֵ֥לֶק שְׂ֝פָתֶ֗יהָ תַּדִּיחֶֽנּוּ: {כב} ה֤וֹלֵ֥ךְ אַחֲרֶ֗יהָ פִּ֫תְאֹ֥ם כְּ֭שׁוֹר אֶל-טָ֣בַח יָב֑וֹא וּ֝כְעֶ֗כֶס אֶל-מוּסַ֥ר אֱוִֽיל: {כג} עַ֤ד יְפַלַּ֪ח חֵ֡ץ כְּֽבֵד֗וֹ כְּמַהֵ֣ר צִפּ֣וֹר אֶל-פָּ֑ח וְלֹֽא-יָ֝דַ֗ע כִּֽי-בְנַפְשׁ֥וֹ הֽוּא: {כד} וְעַתָּ֣ה בָ֭נִים שִׁמְעוּ-לִ֑י וְ֝הַקְשִׁ֗יבוּ לְאִמְרֵי-פִֽי: {כה} אַל-יֵ֣שְׂטְ אֶל-דְּרָכֶ֣יהָ לִבֶּ֑ךָ אַל-תֵּ֝תַע בִּנְתִיבוֹתֶֽיהָ: {כו} כִּֽי-רַבִּ֣ים חֲלָלִ֣ים הִפִּ֑ילָה וַ֝עֲצֻמִ֗ים כָּל-הֲרֻגֶֽיהָ: {כז} דַּרְכֵ֣י שְׁא֣וֹל בֵּיתָ֑הּ יֹ֝רְד֗וֹת אֶל-חַדְרֵי-מָֽוֶת:

משלי פרק-ח

{א} הֲלֹֽא-חָכְמָ֥ה תִקְרָ֑א וּ֝תְבוּנָ֗ה תִּתֵּ֥ן קוֹלָֽהּ: {ב} בְּרֹאשׁ-מְרוֹמִ֥ים עֲלֵי-דָ֑רֶךְ בֵּ֖ית נְתִיב֣וֹת נִצָּֽבָה: {ג} לְיַד-שְׁעָרִ֥ים לְפִי-קָ֑רֶת מְב֖וֹא פְתָחִ֣ים תָּרֹֽנָּה: {ד} אֲלֵיכֶ֣ם אִישִׁ֣ים אֶקְרָ֑א וְ֝קוֹלִ֗י אֶל-בְּנֵ֥י אָדָֽם: {ה} הָבִ֣ינוּ פְתָאיִ֣ם עָרְמָ֑ה וּ֝כְסִילִ֗ים הָבִ֥ינוּ לֵֽב: {ו} שִׁ֭מְעוּ כִּֽי-נְגִידִ֣ים אֲדַבֵּ֑ר וּמִפְתַּ֥ח שְׂ֝פָתַ֗י מֵישָׁרִֽים: {ז} כִּֽי-אֱ֭מֶת יֶהְגֶּ֣ה חִכִּ֑י וְתוֹעֲבַ֖ת שְׂפָתַ֣י רֶֽשַׁע: {ח} בְּצֶ֥דֶק כָּל-אִמְרֵי-פִ֑י אֵ֥ין בָּ֝הֶ֗ם נִפְתָּ֥ל וְעִקֵּֽשׁ: {ט} כֻּלָּ֣ם נְ֭כֹחִים לַמֵּבִ֑ין וִֽ֝ישָׁרִ֗ים לְמֹ֣צְאֵי דָֽעַת: {י} קְחֽוּ-מוּסָרִ֥י וְאַל-כָּ֑סֶף וְ֝דַ֗עַת מֵחָר֥וּץ נִבְחָֽר: {יא} כִּֽי-טוֹבָ֣ה חָ֭כְמָה מִפְּנִינִ֑ים וְכָל-חֲ֝פָצִ֗ים לֹ֣א יִֽשְׁווּ-בָֽהּ: {יב} אֲֽנִי-חָ֭כְמָה שָׁכַ֣נְתִּי עָרְמָ֑ה וְדַ֖עַת מְזִמּ֣וֹת אֶמְצָֽא: {יג} יִֽרְאַ֣ת יְהוָה֮ שְֽׂנֹ֫את רָ֥ע גֵּ֘אָ֤ה וְגָא֨וֹן | וְדֶ֣רֶךְ רָ֭ע וּפִ֨י תַהְפֻּכ֬וֹת שָׂנֵֽאתִי: {יד} לִֽי-עֵ֭צָה וְתוּשִׁיָּ֑ה אֲנִ֥י בִ֝ינָ֗ה לִ֣י גְבוּרָֽה: {טו} בִּ֭י מְלָכִ֣ים יִמְלֹ֑כוּ וְ֝רוֹזְנִ֗ים יְחֹ֣קְקוּ צֶֽדֶק: {טז} בִּ֭י שָׂרִ֣ים יָשֹׂ֑רוּ וּ֝נְדִיבִ֗ים כָּל-שֹׁ֥פְטֵי צֶֽדֶק: {יז} אֲ֭נִי (אהביה) אֹהֲבַ֣י אֵהָ֑ב וּ֝מְשַׁחֲרַ֗י יִמְצָאֻֽנְנִי: {יח} עֹֽשֶׁר-וְכָב֥וֹד אִתִּ֑י ה֥וֹן עָ֝תֵ֗ק וּצְדָקָֽה: {יט} ט֣וֹב פִּ֭רְיִי מֵחָר֣וּץ וּמִפָּ֑ז וּ֝תְבוּאָתִ֗י מִכֶּ֥סֶף נִבְחָֽר: {כ} בְּאֹֽרַח-צְדָקָ֥ה אֲהַלֵּ֑ך בְּ֝ת֗וֹךְ נְתִיב֥וֹת מִשְׁפָּֽט: {כא} לְהַנְחִ֖יל אֹהֲבַ֥י | יֵ֑שׁ וְאֹצְרֹ֖תֵיהֶ֣ם אֲמַלֵּֽא: {כב} יְֽהוָ֗ה קָ֭נָנִי רֵאשִׁ֣ית דַּרְכּ֑וֹ קֶ֖דֶם מִפְעָלָ֣יו מֵאָֽז: {כג} מֵ֭עוֹלָם נִסַּ֥כְתִּי מֵרֹ֗אשׁ מִקַּדְמֵי-אָֽרֶץ: {כד} בְּאֵין-תְּהֹמ֥וֹת חוֹלָ֑לְתִּי בְּאֵ֥ין מַ֝עְיָנ֗וֹת נִכְבַּדֵּי-מָֽיִם: {כה} בְּטֶ֣רֶם הָרִ֣ים הָטְבָּ֑עוּ לִפְנֵ֖י גְבָע֣וֹת חוֹלָֽלְתִּי: {כו} עַד-לֹ֣א עָ֭שָׂה אֶ֣רֶץ וְחוּצ֑וֹת וְ֝רֹ֗אשׁ עָפְר֥וֹת תֵּבֵֽל: {כז} בַּהֲכִינ֣וֹ שָׁ֭מַיִם שָׁ֣ם אָ֑נִי בְּח֥וּקוֹ ח֝֗וּג עַל-פְּנֵ֥י תְהֽוֹם: {כח} בְּאַמְּצ֣וֹ שְׁחָקִ֣ים מִמָּ֑עַל בַּ֝עֲז֗וֹז עִינ֥וֹת תְּהוֹם: {כט} בְּשׂ֘וּמ֤וֹ לַיָּ֨ם | חֻקּ֗וֹ וּ֭מַיִם לֹ֣א יַֽעַבְרוּ-פִ֑יו בְּ֝חוּק֗וֹ מ֣וֹסְדֵי אָֽרֶץ: {ל} וָֽאֶהְיֶ֥ה אֶצְל֗וֹ אָ֫מ֥וֹן וָֽאֶהְיֶ֣ה שַׁ֭עֲשֻׁעִים י֤וֹם | י֑וֹם מְשַׂחֶ֖קֶת לְפָנָ֣יו בְּכָל-עֵֽת: {לא} מְ֭שַׂחֶקֶת בְּתֵבֵ֣ל אַרְצ֑וֹ וְ֝שַׁעֲשֻׁעַ֗י אֶת-בְּנֵ֥י אָדָֽם: {לב} וְעַתָּ֣ה בָ֭נִים שִׁמְעוּ-לִ֑י וְ֝אַשְׁרֵ֗י דְּרָכַ֥י יִשְׁמֹֽרוּ: {לג} שִׁמְע֖וּ מוּסָ֥ר וַחֲכָ֗מוּ וְאַל-תִּפְרָֽעוּ: {לד} אַ֥שְֽׁרֵי אָדָם֮ שֹׁמֵ֪עַֽ֫ לִ֥י לִשְׁקֹ֣ד עַל-דַּ֭לְתֹתַי י֤וֹם | י֑וֹם לִ֝שְׁמֹ֗ר מְזוּזֹ֥ת פְּתָחָֽי: {לה} כִּ֣י מֹ֭צְאִי (מצאי) מָצָ֣א חַיִּ֑ים וַיָּ֥פֶק רָ֝צ֗וֹן מֵיְהוָֽה: {לו} וְֽ֭חֹטְאִי חֹמֵ֣ס נַפְשׁ֑וֹ כָּל-מְ֝שַׂנְאַ֗י אָ֣הֲבוּ מָֽוֶת:

משלי פרק-ט

{א} חָ֭כְמוֹת בָּנְתָ֣ה בֵיתָ֑הּ חָצְבָ֖ה עַמּוּדֶ֣יהָ שִׁבְעָֽה: {ב} טָבְחָ֣ה טִ֭בְחָהּ מָסְכָ֣ה יֵינָ֑הּ אַ֝֗ף עָֽרְכָ֥ה שֻׁלְחָנָֽהּ: {ג} שָֽׁלְחָ֣ה נַעֲרֹתֶ֣יהָ תִקְרָ֑א עַל-גַּ֝פֵּ֗י מְרֹ֣מֵי קָֽרֶת: {ד} מִי-פֶ֭תִי יָסֻ֣ר הֵ֑נָּה חֲסַר-לֵ֝֗ב אָ֣מְרָה לּֽוֹ: {ה} לְ֭כוּ לַחֲמ֣וּ בְֽלַחֲמִ֑י וּ֝שְׁת֗וּ בְּיַ֣יִן מָסָֽכְתִּי: {ו} עִזְב֣וּ פְתָאיִ֣ם וִֽחְי֑וּ וְ֝אִשְׁר֗וּ בְּדֶ֣רֶךְ בִּינָֽה: {ז} יֹ֤סֵ֨ר | לֵ֗ץ לֹקֵ֣חַֽ ל֣וֹ קָל֑וֹן וּמוֹכִ֖יחַ לְרָשָׁ֣ע מוּמֽוֹ: {ח} אַל-תּ֣וֹכַח לֵ֭ץ פֶּן-יִשְׂנָאֶ֑ךָּ הוֹכַ֥ח לְ֝חָכָ֗ם וְיֶאֱהָבֶֽךָּ: {ט} תֵּ֣ן לְ֭חָכָם וְיֶחְכַּם-ע֑וֹד הוֹדַ֥ע לְ֝צַדִּ֗יק וְי֣וֹסֶף לֶֽקַח: {י} תְּחִלַּ֣ת חָ֭כְמָה יִרְאַ֣ת יְהוָ֑ה וְדַ֖עַת קְדֹשִׁ֣ים בִּינָֽה: {יא} כִּי-בִ֭י יִרְבּ֣וּ יָמֶ֑יךָ וְיוֹסִ֥יפוּ לְּ֝ךָ֗ שְׁנ֣וֹת חַיִּֽים: {יב} אִם-חָ֭כַמְתָּ חָכַ֣מְתָּ לָּ֑ךְ וְ֝לַ֗צְתָּ לְֽבַדְּךָ֥ תִשָּֽׂא: {יג} אֵ֣שֶׁת כְּ֭סִילוּת הֹֽמִיָּ֑ה פְּ֝תַיּ֗וּת וּבַל-יָ֥דְעָה מָּֽה: {יד} וְֽ֭יָשְׁבָה לְפֶ֣תַח בֵּיתָ֑הּ עַל-כִּ֝סֵּ֗א מְרֹ֣מֵי קָֽרֶת: {טו} לִקְרֹ֥א לְעֹֽבְרֵי-דָ֑רֶךְ הַֽ֝מְיַשְּׁרִ֗ים אֹֽרְחוֹתָֽם: {טז} מִי-פֶ֭תִי יָסֻ֣ר הֵ֑נָּה וַחֲסַר-לֵ֝֗ב וְאָ֣מְרָה לּֽוֹ: {יז} מַֽיִם-גְּנוּבִ֥ים יִמְתָּ֑קוּ וְלֶ֖חֶם סְתָרִ֣ים יִנְעָֽם: {יח} וְֽלֹא-יָ֭דַע כִּֽי-רְפָאִ֣ים שָׁ֑ם בְּעִמְקֵ֖י שְׁא֣וֹל קְרֻאֶֽיהָ:

משלי פרק-י

{א} מִשְׁלֵ֗י שְׁלֹ֫מֹ֥ה בֵּ֣ן חָ֭כָם יְשַׂמַּח-אָ֑ב וּבֵ֥ן כְּ֝סִ֗יל תּוּגַ֥ת אִמּֽוֹ: {ב} לֹא-י֭וֹעִילוּ אוֹצְר֣וֹת רֶ֑שַׁע וּ֝צְדָקָ֗ה תַּצִּ֥יל מִמָּֽוֶת: {ג} לֹֽא-יַרְעִ֣יב יְ֭הוָה נֶ֣פֶשׁ צַדִּ֑יק וְהַוַּ֖ת רְשָׁעִ֣ים יֶהְדֹּֽף: {ד} רָ֗אשׁ עֹשֶׂ֥ה כַף-רְמִיָּ֑ה וְיַ֖ד חָרוּצִ֣ים תַּעֲשִֽׁיר: {ה} אֹגֵ֣ר בַּ֭קַּיִץ בֵּ֣ן מַשְׂכִּ֑יל נִרְדָּ֥ם בַּ֝קָּצִ֗יר בֵּ֣ן מֵבִֽישׁ: {ו} בְּ֭רָכוֹת לְרֹ֣אשׁ צַדִּ֑יק וּפִ֥י רְ֝שָׁעִ֗ים יְכַסֶּ֥ה חָמָֽס: {ז} זֵ֣כֶר צַ֭דִּיק לִבְרָכָ֑ה וְשֵׁ֖ם רְשָׁעִ֣ים יִרְקָֽב: {ח} חֲכַם-לֵ֭ב יִקַּ֣ח מִצְוֹ֑ת וֶאֱוִ֥יל שְׂ֝פָתַ֗יִם יִלָּבֵֽט: {ט} הוֹלֵ֣ךְ בַּ֭תֹּם יֵ֣לֶךְ בֶּ֑טַח וּמְעַקֵּ֥שׁ דְּ֝רָכָ֗יו יִוָּדֵֽעַ: {י} קֹ֣רֵֽץ עַ֭יִן יִתֵּ֣ן עַצָּ֑בֶת וֶאֱוִ֥יל שְׂ֝פָתַ֗יִם יִלָּבֵֽט: {יא} מְק֣וֹר חַ֭יִּים פִּ֣י צַדִּ֑יק וּפִ֥י רְ֝שָׁעִ֗ים יְכַסֶּ֥ה חָמָֽס: {יב} שִׂ֭נְאָה תְּעוֹרֵ֣ר מְדָנִ֑ים וְעַ֥ל כָּל-פְּ֝שָׁעִ֗ים תְּכַסֶּ֥ה אַהֲבָֽה: {יג} בְּשִׂפְתֵ֣י נָ֭בוֹן תִּמָּצֵ֣א חָכְמָ֑ה וְ֝שֵׁ֗בֶט לְגֵ֣ו חֲסַר-לֵֽב: {יד} חֲכָמִ֥ים יִצְפְּנוּ-דָ֑עַת וּפִֽי-אֱ֝וִיל מְחִתָּ֥ה קְרֹבָֽה: {טו} ה֣וֹן עָ֭שִׁיר קִרְיַ֣ת עֻזּ֑וֹ מְחִתַּ֖ת דַּלִּ֣ים רֵישָֽׁם: {טז} פְּעֻלַּ֣ת צַדִּ֣יק לְחַיִּ֑ים תְּבוּאַ֖ת רָשָׁ֣ע לְחַטָּֽאת: {יז} אֹ֣רַח לְ֭חַיִּים שׁוֹמֵ֣ר מוּסָ֑ר וְעוֹזֵ֖ב תּוֹכַ֣חַת מַתְעֶֽה: {יח} מְכַסֶּ֣ה שִׂ֭נְאָה שִׂפְתֵי-שָׁ֑קֶר וּמוֹצִ֥א דִ֝בָּ֗ה ה֣וּא כְסִֽיל: {יט} בְּרֹ֣ב דְּ֭בָרִים לֹ֣א יֶחְדַּל-פָּ֑שַׁע וְחֹשֵׂ֖ךְ שְׂפָתָ֣יו מַשְׂכִּֽיל: {כ} כֶּ֣סֶף נִ֭בְחָר לְשׁ֣וֹן צַדִּ֑יק לֵ֖ב רְשָׁעִ֣ים כִּמְעָֽט: {כא} שִׂפְתֵ֣י צַ֭דִּיק יִרְע֣וּ רַבִּ֑ים וֶֽ֝אֱוִילִ֗ים בַּחֲסַר-לֵ֥ב יָמֽוּתוּ: {כב} בִּרְכַּ֣ת יְ֭הוָה הִ֣יא תַעֲשִׁ֑יר וְלֹֽא-יוֹסִ֖ף עֶ֣צֶב עִמָּֽהּ: {כג} כִּשְׂח֣וֹק לִ֭כְסִיל עֲשׂ֣וֹת זִמָּ֑ה וְ֝חָכְמָ֗ה לְאִ֣ישׁ תְּבוּנָֽה: {כד} מְגוֹרַ֣ת רָ֭שָׁע הִ֣יא תְבוֹאֶ֑נּוּ וְתַאֲוַ֖ת צַדִּיקִ֣ים יִתֵּֽן: {כה} כַּעֲב֣וֹר ס֭וּפָה וְאֵ֣ין רָשָׁ֑ע וְ֝צַדִּ֗יק יְס֣וֹד עוֹלָֽם: {כו} כַּחֹ֤מֶץ | לַשִּׁנַּ֗יִם וְכֶעָשָׁ֥ן לָעֵינָ֑יִם כֵּ֥ן הֶ֝עָצֵ֗ל לְשֹׁלְחָֽיו: {כז} יִרְאַ֣ת יְ֭הוָה תּוֹסִ֣יף יָמִ֑ים וּשְׁנ֖וֹת רְשָׁעִ֣ים תִּקְצֹֽרְנָה: {כח} תּוֹחֶ֣לֶת צַדִּיקִ֣ים שִׂמְחָ֑ה וְתִקְוַ֖ת רְשָׁעִ֣ים תֹּאבֵֽד: {כט} מָע֣וֹז לַ֭תֹּם דֶּ֣רֶךְ יְהוָ֑ה וּ֝מְחִתָּ֗ה לְפֹ֣עֲלֵי אָֽוֶן: {ל} צַדִּ֣יק לְעוֹלָ֣ם בַּל-יִמּ֑וֹט וּ֝רְשָׁעִ֗ים לֹ֣א יִשְׁכְּנוּ-אָֽרֶץ: {לא} פִּֽי-צַ֭דִּיק יָנ֣וּב חָכְמָ֑ה וּלְשׁ֥וֹן תַּ֝הְפֻּכ֗וֹת תִּכָּרֵֽת: {לב} שִׂפְתֵ֣י צַ֭דִּיק יֵדְע֣וּן רָצ֑וֹן וּפִ֥י רְ֝שָׁעִ֗ים תַּהְפֻּכֽוֹת:

משלי פרק-יא

{א} מֹאזְנֵ֣י מִ֭רְמָה תּוֹעֲבַ֣ת יְהוָ֑ה וְאֶ֖בֶן שְׁלֵמָ֣ה רְצוֹנֽוֹ: {ב} בָּֽא-זָ֭דוֹן וַיָּבֹ֣א קָל֑וֹן וְֽאֶת-צְנוּעִ֥ים חָכְמָֽה: {ג} תֻּמַּ֣ת יְשָׁרִ֣ים תַּנְחֵ֑ם וְסֶ֖לֶף בּוֹגְדִ֣ים (ושדם) יְשָׁדֵּֽם: {ד} לֹא-יוֹעִ֣יל ה֭וֹן בְּי֣וֹם עֶבְרָ֑ה וּ֝צְדָקָ֗ה תַּצִּ֥יל מִמָּֽוֶת: {ה} צִדְקַ֣ת תָּ֭מִים תְּיַשֵּׁ֣ר דַּרְכּ֑וֹ וּ֝בְרִשְׁעָת֗וֹ יִפֹּ֥ל רָשָֽׁע: {ו} צִדְקַ֣ת יְ֭שָׁרִים תַּצִּילֵ֑ם וּ֝בְהַוַּ֗ת בֹּגְדִ֥ים יִלָּכֵֽדוּ: {ז} בְּמ֤וֹת אָדָ֣ם רָ֭שָׁע תֹּאבַ֣ד תִּקְוָ֑ה וְתוֹחֶ֖לֶת אוֹנִ֣ים אָבָֽדָה: {ח} צַ֭דִּיק מִצָּרָ֣ה נֶחֱלָ֑ץ וַיָּבֹ֖א רָשָׁ֣ע תַּחְתָּֽיו: {ט} בְּפֶ֗ה חָ֭נֵף יַשְׁחִ֣ת רֵעֵ֑הוּ וּ֝בְדַ֗עַת צַדִּיקִ֥ים יֵחָלֵֽצוּ: {י} בְּט֣וּב צַ֭דִּיקִים תַּעֲלֹ֣ץ קִרְיָ֑ה וּבַאֲבֹ֖ד רְשָׁעִ֣ים רִנָּֽה: {יא} בְּבִרְכַּ֣ת יְ֭שָׁרִים תָּר֣וּם קָ֑רֶת וּבְפִ֥י רְ֝שָׁעִ֗ים תֵּהָרֵֽס: {יב} בָּז-לְרֵעֵ֥הוּ חֲסַר-לֵ֑ב וְאִ֖ישׁ תְּבוּנ֣וֹת יַחֲרִֽישׁ: {יג} הוֹלֵ֣ךְ רָ֭כִיל מְגַלֶּה-סּ֑וֹד וְנֶאֱמַן-ר֝֗וּחַ מְכַסֶּ֥ה דָבָֽר: {יד} בְּאֵ֣ין תַּ֭חְבֻּלוֹת יִפָּל-עָ֑ם וּ֝תְשׁוּעָ֗ה בְּרֹ֣ב יוֹעֵֽץ: {טו} רַע-יֵ֭רוֹעַ כִּי-עָ֣רַב זָ֑ר וְשֹׂנֵ֖א תֹקְעִ֣ים בּוֹטֵֽחַ: {טז} אֵֽשֶׁת-חֵ֭ן תִּתְמֹ֣ךְ כָּב֑וֹד וְ֝עָרִיצִ֗ים יִתְמְכוּ-עֹֽשֶׁר: {יז} גֹּמֵ֣ל נַ֭פְשׁוֹ אִ֣ישׁ חָ֑סֶד וְעֹכֵ֥ר שְׁ֝אֵר֗וֹ אַכְזָרִֽי: {יח} רָשָׁ֗ע עֹשֶׂ֥ה פְעֻלַּת-שָׁ֑קֶר וְזֹרֵ֥עַ צְ֝דָקָ֗ה שֶׂ֣כֶר אֱמֶֽת: {יט} כֵּן-צְדָקָ֥ה לְחַיִּ֑ים וּמְרַדֵּ֖ף רָעָ֣ה לְמוֹתֽוֹ: {כ} תּוֹעֲבַ֣ת יְ֭הוָה עִקְּשֵׁי-לֵ֑ב וּ֝רְצוֹנ֗וֹ תְּמִ֣ימֵי דָֽרֶךְ: {כא} יָ֣ד לְ֭יָד לֹא-יִנָּ֣קֶה רָּ֑ע וְזֶ֖רַע צַדִּיקִ֣ים נִמְלָֽט: {כב} נֶ֣זֶם זָ֭הָב בְּאַ֣ף חֲזִ֑יר אִשָּׁ֥ה יָ֝פָ֗ה וְסָ֣רַת טָֽעַם: {כג} תַּאֲוַ֣ת צַדִּיקִ֣ים אַךְ-ט֑וֹב תִּקְוַ֖ת רְשָׁעִ֣ים עֶבְרָֽה: {כד} יֵ֣שׁ מְ֭פַזֵּר וְנוֹסָ֥ף ע֑וֹד וְחוֹשֵׂ֥ךְ מִ֝יֹּ֗שֶׁר אַךְ-לְמַחְסֽוֹר: {כה} נֶֽפֶשׁ-בְּרָכָ֥ה תְדֻשָּׁ֑ן וּ֝מַרְוֶ֗ה גַּם-ה֥וּא יוֹרֶֽא: {כו} מֹ֣נֵֽעַ בָּ֭ר יִקְּבֻ֣הוּ לְא֑וֹם וּ֝בְרָכָ֗ה לְרֹ֣אשׁ מַשְׁבִּֽיר: {כז} שֹׁ֣חֵֽר ט֭וֹב יְבַקֵּ֣שׁ רָצ֑וֹן וְדֹרֵ֖שׁ רָעָ֣ה תְבוֹאֶֽנּוּ: {כח} בּוֹטֵ֣חַ בְּ֭עָשְׁרוֹ ה֣וּא יִפֹּ֑ל וְ֝כֶעָלֶ֗ה צַדִּיקִ֥ים יִפְרָֽחוּ: {כט} עוֹכֵ֣ר בֵּ֭יתוֹ יִנְחַל-ר֑וּחַ וְעֶ֥בֶד אֱ֝וִ֗יל לַחֲכַם-לֵֽב: {ל} פְּֽרִי-צַ֭דִּיק עֵ֣ץ חַיִּ֑ים וְלֹקֵ֖חַ נְפָשׂ֣וֹת חָכָֽם: {לא} הֵ֣ן צַ֭דִּיק בָּאָ֣רֶץ יְשֻׁלָּ֑ם אַ֝֗ף כִּֽי-רָשָׁ֥ע וְחוֹטֵֽא:

משלי פרק-יב

{א} אֹהֵ֣ב מ֖וּסָר אֹ֣הֵֽב דָּ֑עַת וְשֹׂנֵ֖א תוֹכַ֣חַת בָּֽעַר: {ב} ט֗וֹב יָפִ֣יק רָ֭צוֹן מֵיְהוָ֑ה וְאִ֖ישׁ מְזִמּ֣וֹת יַרְשִֽׁיעַ: {ג} לֹא-יִכּ֣וֹן אָדָ֣ם בְּרֶ֑שַׁע וְשֹׁ֥רֶשׁ צַ֝דִּיקִ֗ים בַּל-יִמּֽוֹט: {ד} אֵֽשֶׁת-חַ֭יִל עֲטֶ֣רֶת בַּעְלָ֑הּ וּכְרָקָ֖ב בְּעַצְמוֹתָ֣יו מְבִישָֽׁה: {ה} מַחְשְׁב֣וֹת צַדִּיקִ֣ים מִשְׁפָּ֑ט תַּחְבֻּל֖וֹת רְשָׁעִ֣ים מִרְמָֽה: {ו} דִּבְרֵ֣י רְשָׁעִ֣ים אֱרָב-דָּ֑ם וּפִ֥י יְ֝שָׁרִ֗ים יַצִּילֵֽם: {ז} הָפ֣וֹךְ רְשָׁעִ֣ים וְאֵינָ֑ם וּבֵ֖ית צַדִּיקִ֣ים יַעֲמֹֽד: {ח} לְֽפִי-שִׂ֭כְלוֹ יְהֻלַּל-אִ֑ישׁ וְנַעֲוֵה-לֵ֝֗ב יִהְיֶ֥ה לָבֽוּז: {ט} ט֣וֹב נִ֭קְלֶה וְעֶ֣בֶד ל֑וֹ מִ֝מְּתַכַּבֵּ֗ד וַחֲסַר-לָֽחֶם: {י} יוֹדֵ֣עַ צַ֭דִּיק נֶ֣פֶשׁ בְּהֶמְתּ֑וֹ וְֽרַחֲמֵ֥י רְ֝שָׁעִ֗ים אַכְזָרִֽי: {יא} עֹבֵ֣ד אַ֭דְמָתוֹ יִֽשְׂבַּֽע-לָ֑חֶם וּמְרַדֵּ֖ף רֵיקִ֣ים חֲסַר-לֵֽב: {יב} חָמַ֣ד רָ֭שָׁע מְצ֣וֹד רָעִ֑ים וְשֹׁ֖רֶשׁ צַדִּיקִ֣ים יִתֵּֽן: {יג} בְּפֶ֣שַׁע שְׂ֭פָתַיִם מוֹקֵ֣שׁ רָ֑ע וַיֵּצֵ֖א מִצָּרָ֣ה צַדִּֽיק: {יד} מִפְּרִ֣י פִי-אִ֭ישׁ יִשְׂבַּע-ט֑וֹב וּגְמ֥וּל יְדֵי-אָ֝דָ֗ם (ישוב) יָשִׁ֥יב לֽוֹ: {טו} דֶּ֣רֶךְ אֱ֭וִיל יָשָׁ֣ר בְּעֵינָ֑יו וְשֹׁמֵ֖עַ לְעֵצָ֣ה חָכָֽם: {טז} אֱוִ֗יל בַּ֭יּוֹם יִוָּדַ֣ע כַּעְס֑וֹ וְכֹסֶ֖ה קָל֣וֹן עָרֽוּם: {יז} יָפִ֣יחַ אֱ֭מוּנָה יַגִּ֣יד צֶ֑דֶק וְעֵ֖ד שְׁקָרִ֣ים מִרְמָֽה: {יח} יֵ֣שׁ בּ֖וֹטֶה כְּמַדְקְר֣וֹת חָ֑רֶב וּלְשׁ֖וֹן חֲכָמִ֣ים מַרְפֵּֽא: {יט} שְֽׂפַת-אֱ֭מֶת תִּכּ֣וֹן לָעַ֑ד וְעַד-אַ֝רְגִּ֗יעָה לְשׁ֣וֹן שָֽׁקֶר: {כ} מִ֭רְמָה בְּלֶב-חֹ֣רְשֵׁי רָ֑ע וּֽלְיֹעֲצֵ֖י שָׁל֣וֹם שִׂמְחָֽה: {כא} לֹא-יְאֻנֶּ֣ה לַצַּדִּ֣יק כָּל-אָ֑וֶן וּ֝רְשָׁעִ֗ים מָ֣לְאוּ רָֽע: {כב} תּוֹעֲבַ֣ת יְ֭הוָה שִׂפְתֵי-שָׁ֑קֶר וְעֹשֵׂ֖י אֱמוּנָ֣ה רְצוֹנֽוֹ: {כג} אָדָ֣ם עָ֭רוּם כֹּ֣סֶה דָּ֑עַת וְלֵ֥ב כְּ֝סִילִ֗ים יִקְרָ֥א אִוֶּֽלֶת: {כד} יַד-חָרוּצִ֥ים תִּמְשׁ֑וֹל וּ֝רְמִיָּ֗ה תִּהְיֶ֥ה לָמַֽס: {כה} דְּאָגָ֣ה בְלֶב-אִ֣ישׁ יַשְׁחֶ֑נָּה וְדָבָ֖ר ט֣וֹב יְשַׂמְּחֶֽנָּה: {כו} יָתֵ֣ר מֵרֵעֵ֣הוּ צַדִּ֑יק וְדֶ֖רֶךְ רְשָׁעִ֣ים תַּתְעֵֽם: {כז} לֹא-יַחֲרֹ֣ךְ רְמִיָּ֣ה צֵיד֑וֹ וְהוֹן-אָדָ֖ם יָקָ֣ר חָרֽוּץ: {כח} בְּאֹֽרַח-צְדָקָ֥ה חַיִּ֑ים וְדֶ֖רֶךְ נְתִיבָ֣ה אַל-מָֽוֶת:

משלי פרק-יג

{א} בֵּ֣ן חָ֭כָם מ֣וּסַר אָ֑ב וְ֝לֵ֗ץ לֹא-שָׁמַ֥ע גְּעָרָֽה: {ב} מִפְּרִ֣י פִי-אִ֭ישׁ יֹ֣אכַל ט֑וֹב וְנֶ֖פֶשׁ בֹּגְדִ֣ים חָמָֽס: {ג} נֹצֵ֣ר פִּ֭יו שֹׁמֵ֣ר נַפְשׁ֑וֹ פֹּשֵׂ֥ק שְׂ֝פָתָ֗יו מְחִתָּה-לֽוֹ: {ד} מִתְאַוָּ֣ה וָ֭אַיִן נַפְשׁ֣וֹ עָצֵ֑ל וְנֶ֖פֶשׁ חָרֻצִ֣ים תְּדֻשָּֽׁן: {ה} דְּבַר-שֶׁ֭קֶר יִשְׂנָ֣א צַדִּ֑יק וְ֝רָשָׁ֗ע יַבְאִ֥ישׁ וְיַחְפִּֽיר: {ו} צְ֭דָקָה תִּצֹּ֣ר תָּם-דָּ֑רֶךְ וְ֝רִשְׁעָ֗ה תְּסַלֵּ֥ף חַטָּֽאת: {ז} יֵ֣שׁ מִ֭תְעַשֵּׁר וְאֵ֣ין כֹּ֑ל מִ֝תְרוֹשֵׁ֗שׁ וְה֣וֹן רָֽב: {ח} כֹּ֣פֶר נֶֽפֶשׁ-אִ֣ישׁ עָשְׁר֑וֹ וְ֝רָ֗שׁ לֹא-שָׁמַ֥ע גְּעָרָֽה: {ט} אוֹר-צַדִּיקִ֥ים יִשְׂמָ֑ח וְנֵ֖ר רְשָׁעִ֣ים יִדְעָֽךְ: {י} רַק-בְּ֭זָדוֹן יִתֵּ֣ן מַצָּ֑ה וְאֶת-נ֖וֹעָצִ֣ים חָכְמָֽה: {יא} ה֭וֹן מֵהֶ֣בֶל יִמְעָ֑ט וְקֹבֵ֖ץ עַל-יָ֣ד יַרְבֶּֽה: {יב} תּוֹחֶ֣לֶת מְ֭מֻשָּׁכָה מַחֲלָה-לֵ֑ב וְעֵ֥ץ חַ֝יִּ֗ים תַּאֲוָ֥ה בָאָֽה: {יג} בָּ֣ז לְ֭דָבָר יֵחָ֣בֶל ל֑וֹ וִירֵ֥א מִ֝צְוָ֗ה ה֣וּא יְשֻׁלָּֽם: {יד} תּוֹרַ֣ת חָ֭כָם מְק֣וֹר חַיִּ֑ים לָ֝ס֗וּר מִמֹּ֥קְשֵׁי מָֽוֶת: {טו} שֵֽׂכֶל-ט֭וֹב יִתֶּן-חֵ֑ן וְדֶ֖רֶךְ בֹּגְדִ֣ים אֵיתָֽן: {טז} כָּל-עָ֭רוּם יַעֲשֶׂ֣ה בְדָ֑עַת וּ֝כְסִ֗יל יִפְרֹ֥שׂ אִוֶּֽלֶת: {יז} מַלְאָ֣ךְ רָ֭שָׁע יִפֹּ֣ל בְּרָ֑ע וְצִ֖יר אֱמוּנִ֣ים מַרְפֵּֽא: {יח} רֵ֣ישׁ וְ֭קָלוֹן פּוֹרֵ֣עַ מוּסָ֑ר וְשׁוֹמֵ֖ר תּוֹכַ֣חַת יְכֻבָּֽד: {יט} תַּאֲוָ֣ה נִ֭הְיָה תֶּעֱרַ֣ב לְנָ֑פֶשׁ וְתוֹעֲבַ֥ת כְּ֝סִילִ֗ים ס֣וּר מֵרָֽע: {כ} (הלוך) הוֹלֵ֣ךְ אֶת-חֲכָמִ֣ים (וחכם) יֶחְכָּ֑ם וְרֹעֶ֖ה כְסִילִ֣ים יֵרֽוֹעַ: {כא} חַ֭טָּאִים תְּרַדֵּ֣ף רָעָ֑ה וְאֶת-צַ֝דִּיקִ֗ים יְשַׁלֶּם-טֽוֹב: {כב} ט֗וֹב יַנְחִ֥יל בְּנֵֽי-בָנִ֑ים וְצָפ֥וּן לַ֝צַּדִּ֗יק חֵ֣יל חוֹטֵֽא: {כג} רָב-אֹ֭כֶל נִ֣יר רָאשִׁ֑ים וְיֵ֥שׁ נִ֝סְפֶּ֗ה בְּלֹ֣א מִשְׁפָּֽט: {כד} חוֹשֵׂ֣ךְ שִׁ֭בְטוֹ שׂוֹנֵ֣א בְנ֑וֹ וְ֝אֹהֲב֗וֹ שִֽׁחֲר֥וֹ מוּסָֽר: {כה} צַדִּ֗יק אֹ֭כֵל לְשֹׂ֣בַע נַפְשׁ֑וֹ וּבֶ֖טֶן רְשָׁעִ֣ים תֶּחְסָֽר:

משלי פרק-יד

{א} חַכְמ֣וֹת נָ֭שִׁים בָּנְתָ֣ה בֵיתָ֑הּ וְ֝אִוֶּ֗לֶת בְּיָדֶ֥יהָ תֶהֶרְסֶֽנּוּ: {ב} הוֹלֵ֣ךְ בְּ֭יָשְׁרוֹ יְרֵ֣א יְהוָ֑ה וּנְל֖וֹז דְּרָכָ֣יו בּוֹזֵֽהוּ: {ג} בְּֽפִי-אֱ֭וִיל חֹ֣טֶר גַּאֲוָ֑ה וְשִׂפְתֵ֥י חֲ֝כָמִ֗ים תִּשְׁמוּרֵֽם: {ד} בְּאֵ֣ין אֲ֭לָפִים אֵב֣וּס בָּ֑ר וְרָב-תְּ֝בוּא֗וֹת בְּכֹ֣חַ שֽׁוֹר: {ה} עֵ֣ד אֱ֭מוּנִים לֹ֣א יְכַזֵּ֑ב וְיָפִ֥יחַ כְּ֝זָבִ֗ים עֵ֣ד שָֽׁקֶר: {ו} בִּקֶּשׁ-לֵ֣ץ חָכְמָ֣ה וָאָ֑יִן וְדַ֖עַת לְנָב֣וֹן נָקָֽל: {ז} לֵ֣ךְ מִ֭נֶּגֶד לְאִ֣ישׁ כְּסִ֑יל וּבַל-יָ֝דַ֗עְתָּ שִׂפְתֵי-דָֽעַת: {ח} חָכְמַ֣ת עָ֭רוּם הָבִ֣ין דַּרְכּ֑וֹ וְאִוֶּ֖לֶת כְּסִילִ֣ים מִרְמָֽה: {ט} אֱ֭וִלִים יָלִ֣יץ אָשָׁ֑ם וּבֵ֖ין יְשָׁרִ֣ים רָצֽוֹן: {י} לֵ֗ב י֭וֹדֵעַ מָרַּ֣ת נַפְשׁ֑וֹ וּ֝בְשִׂמְחָת֗וֹ לֹא-יִתְעָ֥רַב זָֽר: {יא} בֵּ֣ית רְ֭שָׁעִים יִשָּׁמֵ֑ד וְאֹ֖הֶל יְשָׁרִ֣ים יַפְרִֽיחַ: {יב} יֵ֤שׁ דֶּ֣רֶךְ יָ֭שָׁר לִפְנֵי-אִ֑ישׁ וְ֝אַחֲרִיתָ֗הּ דַּרְכֵי-מָֽוֶת: {יג} גַּם-בִּשְׂח֥וֹק יִכְאַב-לֵ֑ב וְאַחֲרִיתָ֖הּ שִׂמְחָ֣ה תוּגָֽה: {יד} מִדְּרָכָ֣יו יִ֭שְׂבַּע ס֣וּג לֵ֑ב וּ֝מֵעָלָ֗יו אִ֣ישׁ טֽוֹב: {טו} פֶּ֭תִי יַאֲמִ֣ין לְכָל-דָּבָ֑ר וְ֝עָר֗וּם יָבִ֥ין לַאֲשֻׁרֽוֹ: {טז} חָכָ֣ם יָ֭רֵא וְסָ֣ר מֵרָ֑ע וּ֝כְסִ֗יל מִתְעַבֵּ֥ר וּבוֹטֵֽחַ: {יז} קְֽצַר-אַ֭פַּיִם יַעֲשֶׂ֣ה אִוֶּ֑לֶת וְאִ֥ישׁ מְ֝זִמּ֗וֹת יִשָּׂנֵֽא: {יח} נָחֲל֣וּ פְתָאיִ֣ם אִוֶּ֑לֶת וַֽ֝עֲרוּמִ֗ים יַכְתִּ֥רוּ דָֽעַת: {יט} שַׁח֣וּ רָ֭עִים לִפְנֵ֣י טוֹבִ֑ים וּ֝רְשָׁעִ֗ים עַֽל-שַׁעֲרֵ֥י צַדִּֽיק: {כ} גַּם-לְ֭רֵעֵהוּ יִשָּׂ֣נֵא רָ֑שׁ וְאֹהֲבֵ֖י עָשִׁ֣יר רַבִּֽים: {כא} בָּז-לְרֵעֵ֥הוּ חוֹטֵ֑א וּמְחוֹנֵ֖ן (עניים) עֲנָוִ֣ים אַשְׁרָֽיו: {כב} הֲֽלוֹא-יִ֭תְעוּ חֹ֣רְשֵׁי רָ֑ע וְחֶ֥סֶד וֶ֝אֱמֶ֗ת חֹ֣רְשֵׁי טֽוֹב: {כג} בְּכָל-עֶ֭צֶב יִהְיֶ֣ה מוֹתָ֑ר וּדְבַר-שְׂ֝פָתַ֗יִם אַךְ-לְמַחְסֽוֹר: {כד} עֲטֶ֣רֶת חֲכָמִ֣ים עָשְׁרָ֑ם אִוֶּ֖לֶת כְּסִילִ֣ים אִוֶּֽלֶת: {כה} מַצִּ֣יל נְ֭פָשׁוֹת עֵ֣ד אֱמֶ֑ת וְיָפִ֖חַ כְּזָבִ֣ים מִרְמָֽה: {כו} בְּיִרְאַ֣ת יְ֭הוָה מִבְטַח-עֹ֑ז וּ֝לְבָנָ֗יו יִהְיֶ֥ה מַחְסֶֽה: {כז} יִרְאַ֣ת יְ֭הוָה מְק֣וֹר חַיִּ֑ים לָ֝ס֗וּר מִמֹּ֥קְשֵׁי מָֽוֶת: {כח} בְּרָב-עָ֥ם הַדְרַת-מֶ֑לֶךְ וּבְאֶ֥פֶס לְ֝אֹ֗ם מְחִתַּ֥ת רָזֽוֹן: {כט} אֶ֣רֶךְ אַ֭פַּיִם רַב-תְּבוּנָ֑ה וּקְצַר-ר֝֗וּחַ מֵרִ֥ים אִוֶּֽלֶת: {ל} חַיֵּ֣י בְ֭שָׂרִים לֵ֣ב מַרְפֵּ֑א וּרְקַ֖ב עֲצָמ֣וֹת קִנְאָֽה: {לא} עֹ֣שֵֽׁק-דָּ֭ל חֵרֵ֣ף עֹשֵׂ֑הוּ וּ֝מְכַבְּד֗וֹ חֹנֵ֥ן אֶבְיֽוֹן: {לב} בְּֽ֭רָעָתוֹ יִדָּחֶ֣ה רָשָׁ֑ע וְחֹסֶ֖ה בְמוֹת֣וֹ צַדִּֽיק: {לג} בְּלֵ֣ב נָ֭בוֹן תָּנ֣וּחַ חָכְמָ֑ה וּבְקֶ֥רֶב כְּ֝סִילִ֗ים תִּוָּדֵֽעַ: {לד} צְדָקָ֥ה תְרֽוֹמֵֽם-גּ֑וֹי וְחֶ֖סֶד לְאֻמִּ֣ים חַטָּֽאת: {לה} רְֽצוֹן-מֶ֭לֶךְ לְעֶ֣בֶד מַשְׂכִּ֑יל וְ֝עֶבְרָת֗וֹ תִּהְיֶ֥ה מֵבִֽישׁ:

משלי פרק-טו

{א} מַֽעֲנֶה-רַּ֭ךְ יָשִׁ֣יב חֵמָ֑ה וּדְבַר-עֶ֝֗צֶב יַעֲלֶה-אָֽף: {ב} לְשׁ֣וֹן חֲ֭כָמִים תֵּיטִ֣יב דָּ֑עַת וּפִ֥י כְ֝סִילִ֗ים יַבִּ֥יעַ אִוֶּֽלֶת: {ג} בְּֽכָל-מָ֭קוֹם עֵינֵ֣י יְהוָ֑ה צֹ֝פ֗וֹת רָעִ֥ים וטוֹבִֽים: {ד} מַרְפֵּ֣א לָ֭שׁוֹן עֵ֣ץ חַיִּ֑ים וְסֶ֥לֶף בָּ֝֗הּ שֶׁ֣בֶר בְּרֽוּחַ: {ה} אֱוִ֗יל יִ֭נְאַץ מוּסַ֣ר אָבִ֑יו וְשֹׁמֵ֖ר תּוֹכַ֣חַת יַעְרִֽם: {ו} בֵּ֣ית צַ֭דִּיק חֹ֣סֶן רָ֑ב וּבִתְבוּאַ֖ת רָשָׁ֣ע נֶעְכָּֽרֶת: {ז} שִׂפְתֵ֣י חֲ֭כָמִים יְזָ֣רוּ דָ֑עַת וְלֵ֖ב כְּסִילִ֣ים לֹא-כֵֽן: {ח} זֶ֣בַח רְ֭שָׁעִים תּוֹעֲבַ֣ת יְהוָ֑ה וּתְפִלַּ֖ת יְשָׁרִ֣ים רְצוֹנֽוֹ: {ט} תּוֹעֲבַ֣ת יְ֭הוָה דֶּ֣רֶךְ רָשָׁ֑ע וּמְרַדֵּ֖ף צְדָקָ֣ה יֶאֱהָֽב: {י} מוּסָ֣ר רָ֭ע לְעֹזֵ֣ב אֹ֑רַח שׂוֹנֵ֖א תוֹכַ֣חַת יָמֽוּת: {יא} שְׁא֣וֹל וַ֭אֲבַדּוֹן נֶ֣גֶד יְהוָ֑ה אַ֝֗ף כִּֽי-לִבּ֥וֹת בְּֽנֵי-אָדָֽם: {יב} לֹ֣א יֶאֱהַב-לֵ֭ץ הוֹכֵ֣חַֽ ל֑וֹ אֶל-חֲ֝כָמִ֗ים לֹ֣א יֵלֵֽךְ: {יג} לֵ֣ב שָׂ֭מֵחַ יֵיטִ֣ב פָּנִ֑ים וּבְעַצְּבַת-לֵ֝ב ר֣וּחַ נְכֵאָֽה: {יד} לֵ֣ב נָ֭בוֹן יְבַקֶּשׁ-דָּ֑עַת (ופני) וּפִ֥י כְ֝סִילִ֗ים יִרְעֶ֥ה אִוֶּֽלֶת: {טו} כָּל-יְמֵ֣י עָנִ֣י רָעִ֑ים וְטֽוֹב-לֵ֝֗ב מִשְׁתֶּ֥ה תָמִֽיד: {טז} טוֹב-מְ֭עַט בְּיִרְאַ֣ת יְהוָ֑ה מֵאוֹצָ֥ר רָ֝֗ב וּמְה֥וּמָה בֽוֹ: {יז} ט֤וֹב אֲרֻחַ֣ת יָ֭רָק וְאַהֲבָה-שָׁ֑ם מִשּׁ֥וֹר אָ֝ב֗וּס וְשִׂנְאָה-בֽוֹ: {יח} אִ֣ישׁ חֵ֭מָה יְגָרֶ֣ה מָד֑וֹן וְאֶ֥רֶך אַ֝פַּ֗יִם יַשְׁקִ֥יט רִֽיב: {יט} דֶּ֣רֶךְ עָ֭צֵל כִּמְשֻׂ֣כַת חָ֑דֶק וְאֹ֖רַח יְשָׁרִ֣ים סְלֻלָֽה: {כ} בֵּ֣ן חָ֭כָם יְשַׂמַּח-אָ֑ב וּכְסִ֥יל אָ֝דָ֗ם בּוֹזֶ֥ה אִמּֽוֹ: {כא} אִ֭וֶּלֶת שִׂמְחָ֣ה לַחֲסַר-לֵ֑ב וְאִ֥ישׁ תְּ֝בוּנָ֗ה יְיַשֶּׁר-לָֽכֶת: {כב} הָפֵ֣ר מַ֭חֲשָׁבוֹת בְּאֵ֣ין ס֑וֹד וּבְרֹ֖ב יוֹעֲצִ֣ים תָּקֽוּם: {כג} שִׂמְחָ֣ה לָ֭אִישׁ בְּמַעֲנֵה-פִ֑יו וְדָבָ֖ר בְּעִתּ֣וֹ מַה-טּֽוֹב: {כד} אֹ֣רַח חַ֭יִּים לְמַ֣עְלָה לְמַשְׂכִּ֑יל לְמַ֥עַן ס֝֗וּר מִשְּׁא֥וֹל מָֽטָּה: {כה} בֵּ֣ית גֵּ֭אִים יִסַּ֥ח | יְהוָ֑ה וְ֝יַצֵּ֗ב גְּב֣וּל אַלְמָנָֽה: {כו} תּוֹעֲבַ֣ת יְ֭הוָה מַחְשְׁב֣וֹת רָ֑ע וּ֝טְהֹרִ֗ים אִמְרֵי-נֹֽעַם: {כז} עֹכֵ֣ר בֵּ֭יתוֹ בּוֹצֵ֣עַ בָּ֑צַע וְשׂוֹנֵ֖א מַתָּנֹ֣ת יִחְיֶֽה: {כח} לֵ֣ב צַ֭דִּיק יֶהְגֶּ֣ה לַעֲנ֑וֹת וּפִ֥י רְ֝שָׁעִ֗ים יַבִּ֥יעַ רָעֽוֹת: {כט} רָח֣וֹק יְ֭הוָה מֵרְשָׁעִ֑ים וּתְפִלַּ֖ת צַדִּיקִ֣ים יִשְׁמָֽע: {ל} מְֽאוֹר-עֵ֭ינַיִם יְשַׂמַּֽח-לֵ֑ב שְׁמוּעָ֥ה ט֝וֹבָ֗ה תְּדַשֶּׁן-עָֽצֶם: {לא} אֹ֗זֶן שֹׁ֖מַעַת תּוֹכַ֣חַת חַיִּ֑ים בְּקֶ֖רֶב חֲכָמִ֣ים תָּלִֽין: {לב} פּוֹרֵ֣עַ מ֖וּסָר מוֹאֵ֣ס נַפְשׁ֑וֹ וְשׁוֹמֵ֥עַ תּ֝וֹכַ֗חַת ק֣וֹנֶה לֵּֽב: {לג} יִרְאַ֣ת יְ֭הוָה מוּסַ֣ר חָכְמָ֑ה וְלִפְנֵ֖י כָב֣וֹד עֲנָוָֽה:

משלי פרק-טז

{א} לְאָדָ֥ם מַֽעַרְכֵי-לֵ֑ב וּ֝מֵיְהוָ֗ה מַעֲנֵ֥ה לָשֽׁוֹן: {ב} כָּֽל-דַּרְכֵי-אִ֭ישׁ זַ֣ךְ בְּעֵינָ֑יו וְתֹכֵ֖ן רוּח֣וֹת יְהוָֽה: {ג} גֹּ֣ל אֶל-יְהוָ֣ה מַעֲשֶׂ֑יךָ וְ֝יִכֹּ֗נוּ מַחְשְׁבֹתֶֽיךָ: {ד} כֹּ֤ל פָּעַ֣ל יְ֭הוָה לַֽמַּעֲנֵ֑הוּ וְגַם-רָ֝שָׁ֗ע לְי֣וֹם רָעָֽה: {ה} תּוֹעֲבַ֣ת יְ֭הוָה כָּל-גְּבַהּ-לֵ֑ב יָ֥ד לְ֝יָ֗ד לֹ֣א יִנָּקֶֽה: {ו} בְּחֶ֣סֶד וֶ֭אֱמֶת יְכֻפַּ֣ר עָוֹ֑ן וּבְיִרְאַ֥ת יְ֝הוָ֗ה ס֣וּר מֵרָֽע: {ז} בִּרְצ֣וֹת יְ֭הוָה דַּרְכֵי-אִ֑ישׁ גַּם-א֝וֹיְבָ֗יו יַשְׁלִ֥ם אִתּֽוֹ: {ח} טוֹב-מְ֭עַט בִּצְדָקָ֑ה מֵרֹ֥ב תְּ֝בוּא֗וֹת בְּלֹ֣א מִשְׁפָּֽט: {ט} לֵ֣ב אָ֭דָם יְחַשֵּׁ֣ב דַּרְכּ֑וֹ וַֽ֝יהוָ֗ה יָכִ֥ין צַעֲדֽוֹ: {י} קֶ֤סֶם | עַֽל-שִׂפְתֵי-מֶ֑לֶךְ בְּ֝מִשְׁפָּ֗ט לֹ֣א יִמְעַל-פִּֽיו: {יא} פֶּ֤לֶס | וּמֹאזְנֵ֣י מִ֭שְׁפָּט לַֽיהוָ֑ה מַ֝עֲשֵׂ֗הוּ כָּל-אַבְנֵי-כִֽיס: {יב} תּוֹעֲבַ֣ת מְ֭לָכִים עֲשׂ֣וֹת רֶ֑שַׁע כִּ֥י בִ֝צְדָקָ֗ה יִכּ֥וֹן כִּסֵּֽא: {יג} רְצ֣וֹן מְ֭לָכִים שִׂפְתֵי-צֶ֑דֶק וְדֹבֵ֖ר יְשָׁרִ֣ים יֶאֱהָֽב: {יד} חֲמַת-מֶ֥לֶךְ מַלְאֲכֵי-מָ֑וֶת וְאִ֖ישׁ חָכָ֣ם יְכַפְּרֶֽנָּה: {טו} בְּאוֹר-פְּנֵי-מֶ֥לֶךְ חַיִּ֑ים וּ֝רְצוֹנ֗וֹ כְּעָ֣ב מַלְקֽוֹשׁ: {טז} קְֽנֹה-חָכְמָ֗ה מַה-טּ֥וֹב מֵחָר֑וּץ וּקְנ֥וֹת בִּ֝ינָ֗ה נִבְחָ֥ר מִכָּֽסֶף: {יז} מְסִלַּ֣ת יְ֭שָׁרִים ס֣וּר מֵרָ֑ע שֹׁמֵ֥ר נַ֝פְשׁ֗וֹ נֹצֵ֥ר דַּרְכּֽוֹ: {יח} לִפְנֵי-שֶׁ֥בֶר גָּא֑וֹן וְלִפְנֵ֥י כִ֝שָּׁל֗וֹן גֹּ֣בַהּ רֽוּחַ: {יט} ט֣וֹב שְׁפַל-ר֭וּחַ אֶת-(עניים) עֲנָוִ֑ים מֵֽחַלֵּ֥ק שָׁ֝לָ֗ל אֶת-גֵּאִֽים: {כ} מַשְׂכִּ֣יל עַל-דָּ֭בָר יִמְצָא-ט֑וֹב וּבוֹטֵ֖חַ בַּיהוָ֣ה אַשְׁרָֽיו: {כא} לַחֲכַם-לֵ֭ב יִקָּרֵ֣א נָב֑וֹן וּמֶ֥תֶק שְׂ֝פָתַ֗יִם יֹסִ֥יף לֶֽקַח: {כב} מְק֣וֹר חַ֭יִּים שֵׂ֣כֶל בְּעָלָ֑יו וּמוּסַ֖ר אֱוִלִ֣ים אִוֶּֽלֶת: {כג} לֵ֣ב חָ֭כָם יַשְׂכִּ֣יל פִּ֑יהוּ וְעַל-שְׂ֝פָתָ֗יו יֹסִ֥יף לֶֽקַח: {כד} צוּף-דְּ֭בַשׁ אִמְרֵי-נֹ֑עַם מָת֥וֹק לַ֝נֶּפֶשׁ וּמַרְפֵּ֥א לָעָֽצֶם: {כה} יֵ֤שׁ דֶּ֣רֶךְ יָ֭שָׁר לִפְנֵי-אִ֑ישׁ וְ֝אַחֲרִיתָ֗הּ דַּרְכֵי-מָֽוֶת: {כו} נֶ֣פֶשׁ עָ֭מֵל עָ֣מְלָה לּ֑וֹ כִּֽי-אָכַ֖ף עָלָ֣יו פִּֽיהוּ: {כז} אִ֣ישׁ בְּ֭לִיַּעַל כֹּרֶ֣ה רָעָ֑ה וְעַל-(שפתיו) שְׂ֝פָת֗וֹ כְּאֵ֣שׁ צָרָֽבֶת: {כח} אִ֣ישׁ תַּ֭הְפֻּכוֹת יְשַׁלַּ֣ח מָד֑וֹן וְ֝נִרְגָּ֗ן מַפְרִ֥יד אַלּֽוּף: {כט} אִ֣ישׁ חָ֭מָס יְפַתֶּ֣ה רֵעֵ֑הוּ וְ֝הוֹלִיכ֗וֹ בְּדֶ֣רֶךְ לֹא-טֽוֹב: {ל} עֹצֶ֣ה עֵ֭ינָיו לַחְשֹׁ֣ב תַּהְפֻּכ֑וֹת קֹרֵ֥ץ שְׂ֝פָתָ֗יו כִּלָּ֥ה רָעָֽה: {לא} עֲטֶ֣רֶת תִּפְאֶ֣רֶת שֵׂיבָ֑ה בְּדֶ֥רֶךְ צְ֝דָקָ֗ה תִּמָּצֵֽא: {לב} ט֤וֹב אֶ֣רֶךְ אַ֭פַּיִם מִגִּבּ֑וֹר וּמֹשֵׁ֥ל בְּ֝רוּח֗וֹ מִלֹּכֵ֥ד עִֽיר: {לג} בַּ֭חֵיק יוּטַ֣ל אֶת-הַגּוֹרָ֑ל וּ֝מֵיְהוָ֗ה כָּל-מִשְׁפָּטֽוֹ:

משלי פרק-יז

{א} ט֤וֹב פַּ֣ת חֲ֭רֵבָה וְשַׁלְוָה-בָ֑הּ מִ֝בַּ֗יִת מָלֵ֥א זִבְחֵי-רִֽיב: {ב} עֶֽבֶד-מַשְׂכִּ֗יל יִ֭מְשֹׁל בְּבֵ֣ן מֵבִ֑ישׁ וּבְת֥וֹךְ אַ֝חִ֗ים יַחֲלֹ֥ק נַחֲלָֽה: {ג} מַצְרֵ֣ף לַ֭כֶּסֶף וְכ֣וּר לַזָּהָ֑ב וּבֹחֵ֖ן לִבּ֣וֹת יְהוָֽה: {ד} מֵ֭רַע מַקְשִׁ֣יב עַל-שְׂפַת-אָ֑וֶן שֶׁ֥קֶר מֵ֝זִין עַל-לְשׁ֥וֹן הַוֹּֽת: {ה} לֹעֵ֣ג לָ֭רָשׁ חֵרֵ֣ף עֹשֵׂ֑הוּ שָׂמֵ֥חַ לְ֝אֵ֗יד לֹ֣א יִנָּקֶֽה: {ו} עֲטֶ֣רֶת זְ֭קֵנִים בְּנֵ֣י בָנִ֑ים וְתִפְאֶ֖רֶת בָּנִ֣ים אֲבוֹתָֽם: {ז} לֹא-נָאוָ֣ה לְנָבָ֣ל שְׂפַת-יֶ֑תֶר אַ֝֗ף כִּֽי-לְנָדִ֥יב שְׂפַת-שָֽׁקֶר: {ח} אֶֽבֶן-חֵ֣ן הַ֭שֹּׁחַד בְּעֵינֵ֣י בְעָלָ֑יו אֶֽל-כָּל-אֲשֶׁ֖ר יִפְנֶ֣ה יַשְׂכִּֽיל: {ט} מְֽכַסֶּה-פֶּ֭שַׁע מְבַקֵּ֣שׁ אַהֲבָ֑ה וְשֹׁנֶ֥ה בְ֝דָבָ֗ר מַפְרִ֥יד אַלּֽוּף: {י} תֵּ֣חַת גְּעָרָ֣ה בְמֵבִ֑ין מֵהַכּ֖וֹת כְּסִ֣יל מֵאָֽה: {יא} אַךְ-מְרִ֥י יְבַקֶּשׁ-רָ֑ע וּמַלְאָ֥ךְ אַ֝כְזָרִ֗י יְשֻׁלַּח-בּֽוֹ: {יב} פָּג֬וֹשׁ דֹּ֣ב שַׁכּ֣וּל בְּאִ֑ישׁ וְאַל-כְּ֝סִ֗יל בְּאִוַּלְתּֽוֹ: {יג} מֵשִׁ֣יב רָ֭עָה תַּ֣חַת טוֹבָ֑ה לֹא-(תמיש) תָמ֥וּשׁ רָ֝עָ֗ה מִבֵּיתֽוֹ: {יד} פּ֣וֹטֵֽר מַ֭יִם רֵאשִׁ֣ית מָד֑וֹן וְלִפְנֵ֥י הִ֝תְגַּלַּ֗ע הָרִ֥יב נְטֽוֹשׁ: {טו} מַצְדִּ֣יק רָ֭שָׁע וּמַרְשִׁ֣יעַ צַדִּ֑יק תּוֹעֲבַ֥ת יְ֝הוָ֗ה גַּם-שְׁנֵיהֶֽם: {טז} לָמָּה-זֶּ֣ה מְחִ֣יר בְּיַד-כְּסִ֑יל לִקְנ֖וֹת חָכְמָ֣ה וְלֶב-אָֽיִן: {יז} בְּכָל-עֵ֭ת אֹהֵ֣ב הָרֵ֑עַ וְאָ֥ח לְ֝צָרָ֗ה יִוָּלֵֽד: {יח} אָדָ֣ם חֲסַר-לֵ֭ב תּוֹקֵ֣עַ כָּ֑ף עֹרֵ֥ב עֲ֝רֻבָּ֗ה לִפְנֵ֥י רֵעֵֽהוּ: {יט} אֹ֣הֵֽב פֶּ֭שַׁע אֹהֵ֣ב מַצָּ֑ה מַגְבִּ֥יהַּ פִּ֝תְח֗וֹ מְבַקֶּשׁ-שָֽׁבֶר: {כ} עִקֶּשׁ-לֵ֭ב לֹ֣א יִמְצָא-ט֑וֹב וְנֶהְפָּ֥ךְ בִּ֝לְשׁוֹנ֗וֹ יִפּ֥וֹל בְּרָעָֽה: {כא} יֹלֵ֣ד כְּ֭סִיל לְת֣וּגָה ל֑וֹ וְלֹֽא-יִ֝שְׂמַ֗ח אֲבִ֣י נָבָֽל: {כב} לֵ֣ב שָׂ֭מֵחַ יֵיטִ֣ב גֵּהָ֑ה וְר֥וּחַ נְ֝כֵאָ֗ה תְּיַבֶּשׁ-גָּֽרֶם: {כג} שֹׁ֣חַד מֵ֭חֵיק רָשָׁ֣ע יִקָּ֑ח לְ֝הַטּ֗וֹת אָרְח֥וֹת מִשְׁפָּֽט: {כד} אֶת-פְּנֵ֣י מֵבִ֣ין חָכְמָ֑ה וְעֵינֵ֥י כְ֝סִ֗יל בִּקְצֵה-אָֽרֶץ: {כה} כַּ֣עַס לְ֭אָבִיו בֵּ֣ן כְּסִ֑יל וּ֝מֶ֗מֶר לְיוֹלַדְתּֽוֹ: {כו} גַּ֤ם עֲנ֣וֹשׁ לַצַּדִּ֣יק לֹא-ט֑וֹב לְהַכּ֖וֹת נְדִיבִ֣ים עַל-יֹֽשֶׁר: {כז} חוֹשֵׂ֣ךְ אֲ֭מָרָיו יוֹדֵ֣עַ דָּ֑עַת (וקר)-יְקַר-ר֝֗וּחַ אִ֣ישׁ תְּבוּנָֽה: {כח} גַּ֤ם אֱוִ֣יל מַ֭חֲרִישׁ חָכָ֣ם יֵחָשֵׁ֑ב אֹטֵ֖ם שְׂפָתָ֣יו נָבֽוֹן:

משלי פרק-יח

{א} לְֽ֭תַאֲוָה יְבַקֵּ֣שׁ נִפְרָ֑ד בְּכָל-תּ֝וּשִׁיָּ֗ה יִתְגַּלָּֽע: {ב} לֹֽא-יַחְפֹּ֣ץ כְּ֭סִיל בִּתְבוּנָ֑ה כִּ֝֗י אִֽם-בְּהִתְגַּלּ֥וֹת לִבּֽוֹ: {ג} בְּֽבוֹא-רָ֭שָׁע בָּ֣א גַם-בּ֑וּז וְֽעִם-קָל֥וֹן חֶרְפָּֽה: {ד} מַ֣יִם עֲ֭מֻקִּים דִּבְרֵ֣י פִי-אִ֑ישׁ נַ֥חַל נֹ֝בֵ֗עַ מְק֣וֹר חָכְמָֽה: {ה} שְׂאֵ֣ת פְּנֵי-רָשָׁ֣ע לֹא-ט֑וֹב לְהַטּ֥וֹת צַ֝דִּ֗יק בַּמִּשְׁפָּֽט: {ו} שִׂפְתֵ֣י כְ֭סִיל יָבֹ֣אֽוּ בְרִ֑יב וּ֝פִ֗יו לְֽמַהֲלֻמ֥וֹת יִקְרָֽא: {ז} פִּֽי-כְ֭סִיל מְחִתָּה-ל֑וֹ וּ֝שְׂפָתָ֗יו מוֹקֵ֥שׁ נַפְשֽׁוֹ: {ח} דִּבְרֵ֣י נִ֭רְגָּן כְּמִֽתְלַהֲמִ֑ים וְ֝הֵ֗ם יָרְד֥וּ חַדְרֵי-בָֽטֶן: {ט} גַּ֭ם מִתְרַפֶּ֣ה בִמְלַאכְתּ֑וֹ אָ֥ח ה֝֗וּא לְבַ֣עַל מַשְׁחִֽית: {י} מִגְדַּל-עֹ֭ז שֵׁ֣ם יְהוָ֑ה בּֽוֹ-יָר֖וּץ צַדִּ֣יק וְנִשְׂגָּֽב: {יא} ה֣וֹן עָ֭שִׁיר קִרְיַ֣ת עֻזּ֑וֹ וּכְחוֹמָ֥ה נִ֝שְׂגָּבָ֗ה בְּמַשְׂכִּיתֽוֹ: {יב} לִפְנֵי-שֶׁ֭בֶר יִגְבַּ֣הּ לֵב-אִ֑ישׁ וְלִפְנֵ֖י כָב֣וֹד עֲנָוָֽה: {יג} מֵשִׁ֣יב דָּ֭בָר בְּטֶ֣רֶם יִשְׁמָ֑ע אִוֶּ֥לֶת הִיא-ל֝֗וֹ וּכְלִמָּֽה: {יד} רֽוּחַ-אִ֭ישׁ יְכַלְכֵּ֣ל מַחֲלֵ֑הוּ וְר֥וּחַ נְ֝כֵאָ֗ה מִ֣י יִשָּׂאֶֽנָּה: {טו} לֵ֣ב נָ֭בוֹן יִקְנֶה-דָּ֑עַת וְאֹ֥זֶן חֲ֝כָמִ֗ים תְּבַקֶּשׁ-דָּֽעַת: {טז} מַתָּ֣ן אָ֭דָם יַרְחִ֣יב ל֑וֹ וְלִפְנֵ֖י גְדֹלִ֣ים יַנְחֶֽנּוּ: {יז} צַדִּ֣יק הָרִאשׁ֣וֹן בְּרִיב֑וֹ (יבא)-וּבָֽא-רֵ֝עֵ֗הוּ וַחֲקָרֽוֹ: {יח} מִ֭דְיָנִים יַשְׁבִּ֣ית הַגּוֹרָ֑ל וּבֵ֖ין עֲצוּמִ֣ים יַפְרִֽיד: {יט} אָ֗ח נִפְשָׁ֥ע מִקִּרְיַת-עֹ֑ז (ומדונים) וּ֝מִדְיָנִ֗ים כִּבְרִ֥יחַ אַרְמֽוֹן: {כ} מִפְּרִ֣י פִי-אִ֭ישׁ תִּשְׂבַּ֣ע בִּטְנ֑וֹ תְּבוּאַ֖ת שְׂפָתָ֣יו יִשְׂבָּֽע: {כא} מָ֣וֶת וְ֭חַיִּים בְּיַד-לָשׁ֑וֹן וְ֝אֹהֲבֶ֗יהָ יֹאכַ֥ל פִּרְיָֽהּ: {כב} מָצָ֣א אִ֭שָּׁה מָ֣צָא ט֑וֹב וַיָּ֥פֶק רָ֝צ֗וֹן מֵיְהוָֽה: {כג} תַּחֲנוּנִ֥ים יְדַבֶּר-רָ֑שׁ וְ֝עָשִׁ֗יר יַעֲנֶ֥ה עַזּֽוֹת: {כד} אִ֣ישׁ רֵ֭עִים לְהִתְרֹעֵ֑עַ וְיֵ֥שׁ אֹ֝הֵ֗ב דָּבֵ֥ק מֵאָֽח:

משלי פרק-יט

{א} טֽוֹב-רָ֭שׁ הוֹלֵ֣ךְ בְּתֻמּ֑וֹ מֵעִקֵּ֥שׁ שְׂ֝פָתָ֗יו וְה֣וּא כְסִֽיל: {ב} גַּ֤ם בְּלֹא-דַ֣עַת נֶ֣פֶשׁ לֹא-ט֑וֹב וְאָ֖ץ בְּרַגְלַ֣יִם חוֹטֵֽא: {ג} אִוֶּ֣לֶת אָ֭דָם תְּסַלֵּ֣ף דַּרְכּ֑וֹ וְעַל-יְ֝הוָ֗ה יִזְעַ֥ף לִבּֽוֹ: {ד} ה֗וֹן יֹ֭סִיף רֵעִ֣ים רַבִּ֑ים וְ֝דָ֗ל מֵרֵ֥עהוּ יִפָּרֵֽד: {ה} עֵ֣ד שְׁ֭קָרִים לֹ֣א יִנָּקֶ֑ה וְיָפִ֥יחַ כְּ֝זָבִ֗ים לֹ֣א יִמָּלֵֽט: {ו} רַ֭בִּים יְחַלּ֣וּ פְנֵֽי-נָדִ֑יב וְכָל-הָ֝רֵ֗עַ לְאִ֣ישׁ מַתָּֽן: {ז} כָּ֥ל אֲחֵי-רָ֨שׁ | שְֽׂנֵאֻ֗הוּ אַ֤ף כִּ֣י מְ֭רֵעֵהוּ רָחֲק֣וּ מִמֶּ֑נּוּ מְרַדֵּ֖ף אֲמָרִ֣ים (לא)-לוֹ-הֵֽמָּה: {ח} קֹֽנֶה-לֵּ֭ב אֹהֵ֣ב נַפְשׁ֑וֹ שֹׁמֵ֥ר תְּ֝בוּנָ֗ה לִמְצֹא-טֽוֹב: {ט} עֵ֣ד שְׁ֭קָרִים לֹ֣א יִנָּקֶ֑ה וְיָפִ֖יחַ כְּזָבִ֣ים יֹאבֵֽד: {י} לֹֽא-נָאוֶ֣ה לִכְסִ֣יל תַּעֲנ֑וּג אַ֝֗ף כִּֽי-לְעֶ֤בֶד | מְשֹׁ֬ל בְּשָׂרִֽים: {יא} שֵׂ֣כֶל אָ֭דָם הֶאֱרִ֣יךְ אַפּ֑וֹ וְ֝תִפאַרְתּ֗וֹ עֲבֹ֣ר עַל-פָּֽשַׁע: {יב} נַ֣הַם כַּ֭כְּפִיר זַ֣עַף מֶ֑לֶךְ וּכְטַ֖ל עַל-עֵ֣שֶׂב רְצוֹנֽוֹ: {יג} הַוֹּ֣ת לְ֭אָבִיו בֵּ֣ן כְּסִ֑יל וְדֶ֥לֶף טֹ֝רֵ֗ד מִדְיְנֵ֥י אִשָּֽׁה: {יד} בַּ֣יִת וָ֭הוֹן נַחֲלַ֣ת אָב֑וֹת וּ֝מֵיְהוָ֗ה אִשָּׁ֥ה מַשְׂכָּֽלֶת: {טו} עַ֭צְלָה תַּפִּ֣יל תַּרְדֵּמָ֑ה וְנֶ֖פֶשׁ רְמִיָּ֣ה תִרְעָֽב: {טז} שֹׁמֵ֣ר מִ֭צְוָה שֹׁמֵ֣ר נַפְשׁ֑וֹ בּוֹזֵ֖ה דְרָכָ֣יו (יומת) יָמֽוּת: {יז} מַלְוֵ֣ה יְ֭הוָה ח֣וֹנֵֽן דָּ֑ל וּ֝גְמֻל֗וֹ יְשַׁלֶּם-לֽוֹ: {יח} יַסֵּ֣ר בִּ֭נְךָ כִּי-יֵ֣שׁ תִּקְוָ֑ה וְאֶל-הֲ֝מִית֗וֹ אַל-תִּשָּׂ֥א נַפְשֶֽׁךָ: {יט} (גרל)-גְּֽדָל-חֵ֭מָה נֹ֣שֵׂא עֹ֑נֶשׁ כִּ֥י אִם-תַּ֝צִּ֗יל וְע֣וֹד תּוֹסִֽף: {כ} שְׁמַ֣ע עֵ֭צָה וְקַבֵּ֣ל מוּסָ֑ר לְ֝מַ֗עַן תֶּחְכַּ֥ם בְּאַחֲרִיתֶֽךָ: {כא} רַבּ֣וֹת מַחֲשָׁב֣וֹת בְּלֶב-אִ֑ישׁ וַעֲצַ֥ת יְ֝הוָ֗ה הִ֣יא תָקֽוּם: {כב} תַּאֲוַ֣ת אָדָ֣ם חַסְדּ֑וֹ וְטֽוֹב-רָ֝שׁ מֵאִ֥ישׁ כָּזָֽב: {כג} יִרְאַ֣ת יְהוָ֣ה לְחַיִּ֑ים וְשָׂבֵ֥עַ יָ֝לִ֗ין בַּל-יִפָּ֥קֶד רָֽע: {כד} טָ֘מַ֤ן עָצֵ֣ל יָ֭דוֹ בַּצַּלָּ֑חַת גַּם-אֶל-פִּ֝֗יהוּ לֹ֣א יְשִׁיבֶֽנָּה: {כה} לֵ֣ץ תַּ֭כֶּה וּפֶ֣תִי יַעְרִ֑ם וְהוֹכִ֥יחַ לְ֝נָב֗וֹן יָבִ֥ין דָּֽעַת: {כו} מְֽשַׁדֶּד-אָ֭ב יַבְרִ֣יחַ אֵ֑ם בֵּ֝֗ן מֵבִ֥ישׁ וּמַחְפִּֽיר: {כז} חַֽדַל-בְּ֭נִי לִשְׁמֹ֣עַ מוּסָ֑ר לִ֝שְׁג֗וֹת מֵֽאִמְרֵי-דָֽעַת: {כח} עֵ֣ד בְּ֭לִיַּעַל יָלִ֣יץ מִשְׁפָּ֑ט וּפִ֥י רְ֝שָׁעִ֗ים יְבַלַּע-אָֽוֶן: {כט} נָכ֣וֹנוּ לַלֵּצִ֣ים שְׁפָטִ֑ים וּ֝מַהֲלֻמ֗וֹת לְגֵ֣ו כְּסִילִֽים:

משלי פרק-כ

{א} לֵ֣ץ הַ֭יַּין הֹמֶ֣ה שֵׁכָ֑ר וְכָל-שֹׁ֥גֶה בּ֝֗וֹ לֹ֣א יֶחְכָּֽם: {ב} נַ֣הַם כַּ֭כְּפִיר אֵ֣ימַת מֶ֑לֶךְ מִ֝תְעַבְּר֗וֹ חוֹטֵ֥א נַפְשֽׁוֹ: {ג} כָּב֣וֹד לָ֭אִישׁ שֶׁ֣בֶת מֵרִ֑יב וְכָל-אֱ֝וִ֗יל יִתְגַּלָּֽע: {ד} מֵ֭חֹרֶף עָצֵ֣ל לֹא-יַחֲרֹ֑שׁ (ישאל) וְשָׁאַ֖ל בַּקָּצִ֣יר וָאָֽיִן: {ה} מַ֣יִם עֲ֭מֻקִּים עֵצָ֣ה בְלֶב-אִ֑ישׁ וְאִ֖ישׁ תְּבוּנָ֣ה יִדְלֶֽנָּה: {ו} רָב-אָדָ֗ם יִ֭קְרָא אִ֣ישׁ חַסְדּ֑וֹ וְאִ֥ישׁ אֱ֝מוּנִ֗ים מִ֣י יִמְצָֽא: {ז} מִתְהַלֵּ֣ךְ בְּתֻמּ֣וֹ צַדִּ֑יק אַשְׁרֵ֖י בָנָ֣יו אַחֲרָֽיו: {ח} מֶ֗לֶךְ יוֹשֵׁ֥ב עַל-כִּסֵּא-דִ֑ין מְזָרֶ֖ה בְעֵינָ֣יו כָּל-רָֽע: {ט} מִֽי-יֹ֭אמַר זִכִּ֣יתִי לִבִּ֑י טָ֝הַ֗רְתִּי מֵחַטָּאתִֽי: {י} אֶ֣בֶן וָ֭אֶבֶן אֵיפָ֣ה וְאֵיפָ֑ה תּוֹעֲבַ֥ת יְ֝הוָ֗ה גַּם-שְׁנֵיהֶֽם: {יא} גַּ֣ם בְּ֭מַעֲלָלָיו יִתְנַכֶּר-נָ֑עַר אִם-זַ֖ךְ וְאִם-יָשָׁ֣ר פָּעֳלֽוֹ: {יב} אֹ֣זֶן שֹׁ֭מַעַת וְעַ֣יִן רֹאָ֑ה יְ֝הוָ֗ה עָשָׂ֥ה גַם-שְׁנֵיהֶֽם: {יג} אַל-תֶּֽאֱהַ֣ב שֵׁ֭נָה פֶּן-תִּוָּרֵ֑שׁ פְּקַ֖ח עֵינֶ֣יךָ שְֽׂבַֽע-לָֽחֶם: {יד} רַ֣ע רַ֭ע יֹאמַ֣ר הַקּוֹנֶ֑ה וְאֹזֵ֥ל ל֝֗וֹ אָ֣ז יִתְהַלָּֽל: {טו} יֵ֣שׁ זָ֭הָב וְרָב-פְּנִינִ֑ים וּכְלִ֥י יְ֝קָ֗ר שִׂפְתֵי-דָֽעַת: {טז} לְֽקַח-בִּ֭גְדוֹ כִּי-עָ֣רַב זָ֑ר וּבְעַ֖ד (נכרים) נָכְרִיָּ֣ה חַבְלֵֽהוּ: {יז} עָרֵ֣ב לָ֭אִישׁ לֶ֣חֶם שָׁ֑קֶר וְ֝אַחַ֗ר יִמָּֽלֵא-פִ֥יהוּ חָצָֽץ: {יח} מַ֭חֲשָׁבוֹת בְּעֵצָ֣ה תִכּ֑וֹן וּ֝בְתַחְבֻּל֗וֹת עֲשֵׂ֣ה מִלְחָמָֽה: {יט} גּֽוֹלֶה-סּ֭וֹד הוֹלֵ֣ךְ רָכִ֑יל וּלְפֹתֶ֥ה שְׂ֝פָתָ֗יו לֹ֣א תִתְעָרָֽב: {כ} מְ֭קַלֵּל אָבִ֣יו וְאִמּ֑וֹ יִֽדְעַ֥ךְ נֵ֝ר֗וֹ (באישון) בֶּאֱשׁ֥וּן חֹֽשֶׁךְ: {כא} נַ֭חֲלָה (מבחלת) מְבֹהֶ֣לֶת בָּרִאשֹׁנָ֑ה וְ֝אַחֲרִיתָ֗הּ לֹ֣א תְבֹרָֽךְ: {כב} אַל-תֹּאמַ֥ר אֲשַׁלְּמָה-רָ֑ע קַוֵּ֥ה לַֽ֝יהוָ֗ה וְיֹ֣שַֽׁע לָֽךְ: {כג} תּוֹעֲבַ֣ת יְ֭הוָה אֶ֣בֶן וָאָ֑בֶן וּמֹאזְנֵ֖י מִרְמָ֣ה לֹא-טֽוֹב: {כד} מֵיְהוָ֥ה מִצְעֲדֵי-גָ֑בֶר וְ֝אָדָ֗ם מַה-יָּבִ֥ין דַּרְכּֽוֹ: {כה} מוֹקֵ֣שׁ אָ֭דָם יָ֣לַע קֹ֑דֶשׁ וְאַחַ֖ר נְדָרִ֣ים לְבַקֵּֽר: {כו} מְזָרֶ֣ה רְ֭שָׁעִים מֶ֣לֶךְ חָכָ֑ם וַיָּ֖שֶׁב עֲלֵיהֶ֣ם אוֹפָֽן: {כז} נֵ֣ר יְ֭הוָה נִשְׁמַ֣ת אָדָ֑ם חֹ֝פֵ֗שׂ כָּל-חַדְרֵי-בָֽטֶן: {כח} חֶ֣סֶד וֶ֭אֱמֶת יִצְּרוּ-מֶ֑לֶךְ וְסָעַ֖ד בַּחֶ֣סֶד כִּסְאֽוֹ: {כט} תִּפְאֶ֣רֶת בַּחוּרִ֣ים כֹּחָ֑ם וַהֲדַ֖ר זְקֵנִ֣ים שֵׂיבָֽה: {ל} חַבֻּר֣וֹת פֶּ֭צַע (תמריק) תַּמְר֣וּק בְּרָ֑ע וּ֝מַכּ֗וֹת חַדְרֵי-בָֽטֶן:

משלי פרק-כא

{א} פַּלְגֵי-מַ֣יִם לֶב-מֶ֭לֶךְ בְּיַד-יְהוָ֑ה עַֽל-כָּל-אֲשֶׁ֖ר יַחְפֹּ֣ץ יַטֶּֽנּוּ: {ב} כָּֽל-דֶּרֶךְ-אִ֭ישׁ יָשָׁ֣ר בְּעֵינָ֑יו וְתֹכֵ֖ן לִבּ֣וֹת יְהוָֽה: {ג} עֲ֭שֹׂה צְדָקָ֣ה וּמִשְׁפָּ֑ט נִבְחָ֖ר לַיהוָ֣ה מִזָּֽבַח: {ד} רוּם-עֵ֭ינַיִם וּרְחַב-לֵ֑ב נִ֖ר רְשָׁעִ֣ים חַטָּֽאת: {ה} מַחְשְׁב֣וֹת חָ֭רוּץ אַךְ-לְמוֹתָ֑ר וְכָל-אָ֝֗ץ אַךְ-לְמַחְסֽוֹר: {ו} פֹּ֣עַל א֭וֹצָרוֹת בִּלְשׁ֣וֹן שָׁ֑קֶר הֶ֥בֶל נִ֝דָּ֗ף מְבַקְשֵׁי-מָֽוֶת: {ז} שֹׁד-רְשָׁעִ֥ים יְגוֹרֵ֑ם כִּ֥י מֵ֝אֲנ֗וּ לַעֲשׂ֥וֹת מִשְׁפָּֽט: {ח} הֲפַכְפַּ֬ךְ דֶּ֣רֶךְ אִ֣ישׁ וָזָ֑ר וְ֝זַ֗ךְ יָשָׁ֥ר פָּעֳלֽוֹ: {ט} ט֗וֹב לָשֶׁ֥בֶת עַל-פִּנַּת-גָּ֑ג מֵאֵ֥שֶׁת מִ֝דְיָנִ֗ים וּבֵ֥ית חָֽבֶר: {י} נֶ֣פֶשׁ רָ֭שָׁע אִוְּתָה-רָ֑ע לֹא-יֻחַ֖ן בְּעֵינָ֣יו רֵעֵֽהוּ: {יא} בַּעְנָשׁ-לֵ֭ץ יֶחְכַּם-פֶּ֑תִי וּבְהַשְׂכִּ֥יל לְ֝חָכָ֗ם יִקַּח-דָּֽעַת: {יב} מַשְׂכִּ֣יל צַ֭דִּיק לְבֵ֣ית רָשָׁ֑ע מְסַלֵּ֖ף רְשָׁעִ֣ים לָרָֽע: {יג} אֹטֵ֣ם אָ֭זְנוֹ מִזַּעֲקַת-דָּ֑ל גַּֽם-ה֥וּא יִ֝קְרָ֗א וְלֹ֣א יֵעָנֶֽה: {יד} מַתָּ֣ן בַּ֭סֵּתֶר יִכְפֶּה-אָ֑ף וְשֹׁ֥חַד בַּ֝חֵ֗ק חֵמָ֥ה עַזָּֽה: {טו} שִׂמְחָ֣ה לַ֭צַּדִּיק עֲשׂ֣וֹת מִשְׁפָּ֑ט וּ֝מְחִתָּ֗ה לְפֹ֣עֲלֵי אָֽוֶן: {טז} אָדָ֗ם תּ֭וֹעֶה מִדֶּ֣רֶךְ הַשְׂכֵּ֑ל בִּקְהַ֖ל רְפָאִ֣ים יָנֽוּחַ: {יז} אִ֣ישׁ מַ֭חְסוֹר אֹהֵ֣ב שִׂמְחָ֑ה אֹהֵ֥ב יַֽיִן-וָ֝שֶׁ֗מֶן לֹ֣א יַעֲשִֽׁיר: {יח} כֹּ֣פֶר לַצַּדִּ֣יק רָשָׁ֑ע וְתַ֖חַת יְשָׁרִ֣ים בּוֹגֵֽד: {יט} ט֗וֹב שֶׁ֥בֶת בְּאֶֽרֶץ-מִדְבָּ֑ר מֵאֵ֖שֶׁת (מדונים) מִדְיָנִ֣ים וָכָֽעַס: {כ} אוֹצָ֤ר | נֶחְמָ֣ד וָ֭שֶׁמֶן בִּנְוֵ֣ה חָכָ֑ם וּכְסִ֖יל אָדָ֣ם יְבַלְּעֶֽנּוּ: {כא} רֹ֭דֵף צְדָקָ֣ה וָחָ֑סֶד יִמְצָ֥א חַ֝יִּ֗ים צְדָקָ֥ה וְכָבֽוֹד: {כב} עִ֣יר גִּ֭בֹּרִים עָלָ֣ה חָכָ֑ם וַ֝יֹּ֗רֶד עֹ֣ז מִבְטֶחָֽה: {כג} שֹׁמֵ֣ר פִּ֭יו וּלְשׁוֹנ֑וֹ שֹׁמֵ֖ר מִצָּר֣וֹת נַפְשֽׁוֹ: {כד} זֵ֣ד יָ֭הִיר לֵ֣ץ שְׁמ֑וֹ ע֝וֹשֶׂ֗ה בְּעֶבְרַ֥ת זָדֽוֹן: {כה} תַּאֲוַ֣ת עָצֵ֣ל תְּמִיתֶ֑נּוּ כִּֽי-מֵאֲנ֖וּ יָדָ֣יו לַעֲשֽׂוֹת: {כו} כָּל-הַ֭יּוֹם הִתְאַוָּ֣ה תַאֲוָ֑ה וְצַדִּ֥יק יִ֝תֵּ֗ן וְלֹ֣א יַחְשֹֽׂךְ: {כז} זֶ֣בַח רְ֭שָׁעִים תּוֹעֵבָ֑ה אַ֝֗ף כִּֽי-בְזִמָּ֥ה יְבִיאֶֽנּוּ: {כח} עֵד-כְּזָבִ֥ים יֹאבֵ֑ד וְאִ֥ישׁ שׁ֝וֹמֵ֗עַ לָנֶ֥צַח יְדַבֵּֽר: {כט} הֵעֵ֬ז אִ֣ישׁ רָשָׁ֣ע בְּפָנָ֑יו וְ֝יָשָׁ֗ר ה֤וּא | (יכין) יָבִ֬ין (דרכיו) דַּרְכּֽוֹ: {ל} אֵ֣ין חָ֭כְמָה וְאֵ֣ין תְּבוּנָ֑ה וְאֵ֥ין עֵ֝צָ֗ה לְנֶ֣גֶד יְהוָֽה: {לא} ס֗וּס מ֭וּכָן לְי֣וֹם מִלְחָמָ֑ה וְ֝לַֽיהוָ֗ה הַתְּשׁוּעָֽה:

משלי פרק-כב

{א} נִבְחָ֣ר שֵׁ֭ם מֵעֹ֣שֶׁר רָ֑ב מִכֶּ֥סֶף וּ֝מִזָּהָ֗ב חֵ֣ן טֽוֹב: {ב} עָשִׁ֣יר וָרָ֣שׁ נִפְגָּ֑שׁוּ עֹשֵׂ֖ה כֻלָּ֣ם יְהוָֽה: {ג} עָר֤וּם | רָאָ֣ה רָעָ֣ה (ויסתר) וְנִסְתָּ֑ר וּ֝פְתָיִ֗ים עָבְר֥וּ וְֽנֶעֱנָֽשׁוּ: {ד} עֵ֣קֶב עֲ֭נָוָה יִרְאַ֣ת יְהוָ֑ה עֹ֖שֶׁר וְכָב֣וֹד וְחַיִּֽים: {ה} צִנִּ֣ים פַּ֭חִים בְּדֶ֣רֶךְ עִקֵּ֑שׁ שׁוֹמֵ֥ר נַ֝פְשׁ֗וֹ יִרְחַ֥ק מֵהֶֽם: {ו} חֲנֹ֣ךְ לַ֭נַּעַר עַל-פִּ֣י דַרְכּ֑וֹ גַּ֥ם כִּֽי-יַ֝זְקִ֗ין לֹֽא-יָס֥וּר מִמֶּֽנָּה: {ז} עָ֭שִׁיר בְּרָשִׁ֣ים יִמְשׁ֑וֹל וְעֶ֥בֶד ל֝וֶֹ֗ה לְאִ֣ישׁ מַלְוֶֽה: {ח} זוֹרֵ֣עַ עַ֭וְלָה (יקצור)-יִקְצָר-אָ֑וֶן וְשֵׁ֖בֶט עֶבְרָת֣וֹ יִכְלֶֽה: {ט} טֽוֹב-עַ֭יִן ה֣וּא יְבֹרָ֑ךְ כִּֽי-נָתַ֖ן מִלַּחְמ֣וֹ לַדָּֽל: {י} גָּ֣רֵֽשׁ לֵ֭ץ וְיֵצֵ֣א מָד֑וֹן וְ֝יִשְׁבֹּ֗ת דִּ֣ין וְקָלֽוֹן: {יא} אֹהֵ֥ב (טהור)-טְהָר-לֵ֑ב חֵ֥ן שְׂ֝פָתָ֗יו רֵעֵ֥הוּ מֶֽלֶךְ: {יב} עֵינֵ֣י יְ֭הוָה נָ֣צְרוּ דָ֑עַת וַ֝יְסַלֵּ֗ף דִּבְרֵ֥י בֹגֵֽד: {יג} אָמַ֣ר עָ֭צֵל אֲרִ֣י בַח֑וּץ בְּת֥וֹךְ רְ֝חֹב֗וֹת אֵֽרָצֵֽחַ: {יד} שׁוּחָ֣ה עֲ֭מֻקָּה פִּ֣י זָר֑וֹת זְע֥וּם יְ֝הוָ֗ה (יפול)-יִפָּל-שָֽׁם: {טו} אִ֭וֶּלֶת קְשׁוּרָ֣ה בְלֶב-נָ֑עַר שֵׁ֥בֶט מ֝וּסָ֗ר יַרְחִיקֶ֥נָּה מִמֶּֽנּוּ: {טז} עֹ֣שֵֽׁק דָּ֭ל לְהַרְבּ֣וֹת ל֑וֹ נֹתֵ֥ן לְ֝עָשִׁ֗יר אַךְ-לְמַחְסֽוֹר: {יז} הַ֥ט אָזְנְךָ֗ וּ֭שְׁמַע דִּבְרֵ֣י חֲכָמִ֑ים וְ֝לִבְּךָ֗ תָּשִׁ֥ית לְדַעְתִּֽי: {יח} כִּֽי-נָ֭עִים כִּֽי-תִשְׁמְרֵ֣ם בְּבִטְנֶ֑ךָ יִכֹּ֥נוּ יַ֝חְדָּ֗ו עַל-שְׂפָתֶֽיךָ: {יט} לִהְי֣וֹת בַּ֭יהוָה מִבְטַחֶ֑ךָ הוֹדַעְתִּ֖יךָ הַיּ֣וֹם אַף-אָֽתָּה: {כ} הֲלֹ֤א כָתַ֣בְתִּי לְ֭ךָ (שלשום) שָׁלִישִׁ֑ים בְּמ֖וֹעֵצֹ֣ת וָדָֽעַת: {כא} לְהוֹדִֽיעֲךָ֗ קֹ֭שְׁטְ אִמְרֵ֣י אֱמֶ֑ת לְהָשִׁ֥יב אֲמָרִ֥ים אֱ֝מֶ֗ת לְשֹׁלְחֶֽיךָ: {כב} אַֽל-תִּגְזָל-דָּ֭ל כִּ֣י דַל-ה֑וּא וְאַל-תְּדַכֵּ֖א עָנִ֣י בַשָּֽׁעַר: {כג} כִּֽי-יְ֭הוָה יָרִ֣יב רִיבָ֑ם וְקָבַ֖ע אֶת-קֹבְעֵיהֶ֣ם נָֽפֶשׁ: {כד} אַל-תִּ֭תְרַע אֶת-בַּ֣עַל אָ֑ף וְאֶת-אִ֥ישׁ חֵ֝מוֹת לֹ֣א תָבֽוֹא: {כה} פֶּן-תֶּאֱלַ֥ף (ארחתו) אֹֽרְחֹתָ֑יו וְלָקַחְתָּ֖ מוֹקֵ֣שׁ לְנַפְשֶֽׁךָ: {כו} אַל-תְּהִ֥י בְתֹֽקְעֵי-כָ֑ף בַּ֝עֹרְבִ֗ים מַשָּׁאֽוֹת: {כז} אִם-אֵֽין-לְךָ֥ לְשַׁלֵּ֑ם לָ֥מָּה יִקַּ֥ח מִ֝שְׁכָּבְךָ֗ מִתַּחְתֶּֽיךָ: {כח} אַל-תַּ֭סֵּג גְּב֣וּל עוֹלָ֑ם אֲשֶׁ֖ר עָשׂ֣וּ אֲבוֹתֶֽיךָ: {כט} חָזִ֡יתָ אִ֤ישׁ | מָ֘הִ֤יר בִּמְלַאכְתּ֗וֹ לִֽפְנֵֽי-מְלָכִ֥ים יִתְיַצָּ֑ב בַּל-יִ֝תְיַצֵּב לִפְנֵ֥י חֲשֻׁכִּֽים:

משלי פרק-כג

{א} כִּֽי-תֵ֭שֵׁב לִלְח֣וֹם אֶת-מוֹשֵׁ֑ל בִּ֥ין תָּ֝בִ֗ין אֶת-אֲשֶׁ֥ר לְפָנֶֽיךָ: {ב} וְשַׂמְתָּ֣ שַׂכִּ֣ין בְּלֹעֶ֑ךָ אִם-בַּ֖עַל נֶ֣פֶשׁ אָֽתָּה: {ג} אַל-תִּ֭תְאָו לְמַטְעַמּוֹתָ֑יו וְ֝ה֗וּא לֶ֣חֶם כְּזָבִֽים: {ד} אַל-תִּיגַ֥ע לְֽהַעֲשִׁ֑יר מִֽבִּינָתְךָ֥ חֲדָֽל: {ה} (התעוף) הֲתָ֤עִיף עֵינֶ֥יךָ בּ֗וֹ וְֽאֵ֫ינֶ֥נּוּ כִּ֤י עָשֹׂ֣ה יַעֲשֶׂה-לּ֣וֹ כְנָפַ֑יִם כְּ֝נֶ֗שֶׁר (ועיף) יָע֥וּף הַשָּׁמָֽיִם: {ו} אַל-תִּלְחַ֗ם אֶת-לֶ֭חֶם רַ֣ע עָ֑יִן וְאַל-(תתאו) תִּ֝תְאָ֗יו לְמַטְעַמֹּתָֽיו: {ז} כִּ֤י | כְּמוֹ-שָׁעַ֥ר בְּנַפְשׁ֗וֹ כֶּ֫ן-ה֥וּא אֱכֹ֣ל וּ֭שְׁתֵה יֹ֣אמַר לָ֑ךְ וְ֝לִבּ֗וֹ בַּל-עִמָּֽךְ: {ח} פִּֽתְּךָ-אָכַ֥לְתָּ תְקִיאֶ֑נָּה וְ֝שִׁחַ֗תָּ דְּבָרֶ֥יךָ הַנְּעִימִֽים: {ט} בְּאָזְנֵ֣י כְ֭סִיל אַל-תְּדַבֵּ֑ר כִּֽי-יָ֝ב֗וּז לְשֵׂ֣כֶל מִלֶּֽיךָ: {י} אַל-תַּ֭סֵּג גְּב֣וּל עוֹלָ֑ם וּבִשְׂדֵ֥י יְ֝תוֹמִ֗ים אַל-תָּבֹֽא: {יא} כִּֽי-גֹאֲלָ֥ם חָזָ֑ק הֽוּא-יָרִ֖יב אֶת-רִיבָ֣ם אִתָּֽךְ: {יב} הָבִ֣יאָה לַמּוּסָ֣ר לִבֶּ֑ךָ וְ֝אָזְנֶ֗ךָ לְאִמְרֵי-דָֽעַת: {יג} אַל-תִּמְנַ֣ע מִנַּ֣עַר מוּסָ֑ר כִּֽי-תַכֶּ֥נּוּ בַ֝שֵּׁ֗בֶט לֹ֣א יָמֽוּת: {יד} אַ֭תָּה בַּשֵּׁ֣בֶט תַּכֶּ֑נּוּ וְ֝נַפְשׁ֗וֹ מִשְּׁא֥וֹל תַּצִּֽיל: {טו} בְּ֭נִי אִם-חָכַ֣ם לִבֶּ֑ךָ יִשְׂמַ֖ח לִבִּ֣י גַם-אָֽנִי: {טז} וְתַעְלֹ֥זְנָה כִלְיוֹתָ֑י בְּדַבֵּ֥ר שְׂ֝פָתֶ֗יךָ מֵישָׁרִֽים: {יז} אַל-יְקַנֵּ֣א לִ֭בְּךָ בַּֽחַטָּאִ֑ים כִּ֥י אִם-בְּיִרְאַת-יְ֝הוָ֗ה כָּל-הַיּֽוֹם: {יח} כִּ֭י אִם-יֵ֣שׁ אַחֲרִ֑ית וְ֝תִקְוָתְךָ֗ לֹ֣א תִכָּרֵֽת: {יט} שְׁמַע-אַתָּ֣ה בְנִ֣י וַחֲכָ֑ם וְאַשֵּׁ֖ר בַּדֶּ֣רֶךְ לִבֶּֽךָ: {כ} אַל-תְּהִ֥י בְסֹֽבְאֵי-יָ֑יִן בְּזֹלֲלֵ֖י בָשָׂ֣ר לָֽמוֹ: {כא} כִּי-סֹבֵ֣א וְ֭זוֹלֵל יִוָּרֵ֑שׁ וּ֝קְרָעִ֗ים תַּלְבִּ֥ישׁ נוּמָֽה: {כב} שְׁמַ֣ע לְ֭אָבִיךָ זֶ֣ה יְלָדֶ֑ךָ וְאַל-תָּ֝ב֗וּז כִּֽי-זָקְנָ֥ה אִמֶּֽךָ: {כג} אֱמֶ֣ת קְ֭נֵה וְאַל-תִּמְכֹּ֑ר חָכְמָ֖ה וּמוּסָ֣ר וּבִינָֽה: {כד} (גול) גִּ֣יל (יגול) יָ֭גִיל אֲבִ֣י צַדִּ֑יק (יולד) וְיוֹלֵ֥ד חָ֝כָ֗ם (וישמח)-יִשְׂמַח-בּֽוֹ: {כה} יִֽשְׂמַח-אָבִ֥יךָ וְאִמֶּ֑ךָ וְ֝תָגֵ֗ל יֽוֹלַדְתֶּֽךָ: {כו} תְּנָֽה-בְנִ֣י לִבְּךָ֣ לִ֑י וְ֝עֵינֶ֗יךָ דְּרָכַ֥י (תרצנה) תִּצֹּֽרְנָה: {כז} כִּֽי-שׁוּחָ֣ה עֲמֻקָּ֣ה זוֹנָ֑ה וּבְאֵ֥ר צָ֝רָ֗ה נָכְרִיָּֽה: {כח} אַף-הִ֭יא כְּחֶ֣תֶף תֶּֽאֱרֹ֑ב וּ֝בוֹגְדִ֗ים בְּאָדָ֥ם תּוֹסִֽף: {כט} לְמִ֨י א֥וֹי לְמִ֪י אֲב֡וֹי לְמִ֤י (מדונים) מִדְיָנִ֨ים | לְמִ֥י שִׂ֗יחַ לְ֭מִי פְּצָעִ֣ים חִנָּ֑ם לְ֝מִ֗י חַכְלִל֥וּת עֵינָֽיִם: {ל} לַֽמְאַחֲרִ֥ים עַל-הַיָּ֑יִן לַ֝בָּאִ֗ים לַחְקֹ֥ר מִמְסָֽךְ: {לא} אַל-תֵּ֥רֶא יַיִן֮ כִּ֪י יִתְאַ֫דָּ֥ם כִּֽי-יִתֵּ֣ן (בכיס) בַּכּ֣וֹס עֵינ֑וֹ יִ֝תְהַלֵּ֗ךְ בְּמֵישָׁרִֽים: {לב} אַ֭חֲרִיתוֹ כְּנָחָ֣שׁ יִשָּׁ֑ךְ וּֽכְצִפְעֹנִ֥י יַפְרִֽשׁ: {לג} עֵ֭ינֶיךָ יִרְא֣וּ זָר֑וֹת וְ֝לִבְּךָ֗ יְדַבֵּ֥ר תַּהְפֻּכֽוֹת: {לד} וְ֭הָיִיתָ כְּשֹׁכֵ֣ב בְּלֶב-יָ֑ם וּ֝כְשֹׁכֵ֗ב בְּרֹ֣אשׁ חִבֵּֽל: {לה} הִכּ֥וּנִי בַל-חָלִיתִי֮ הֲלָמ֗וּנִי בַּל-יָ֫דָ֥עְתִּי מָתַ֥י אָקִ֑יץ א֝וֹסִ֗יף אֲבַקְשֶׁ֥נּוּ עֽוֹד:

משלי פרק-כד

{א} אַל-תְּ֭קַנֵּא בְּאַנְשֵׁ֣י רָעָ֑ה וְאַל-(תתאו) תִּ֝תְאָ֗יו לִהְי֥וֹת אִתָּֽם: {ב} כִּי-שֹׁ֖ד יֶהְגֶּ֣ה לִבָּ֑ם וְ֝עָמָ֗ל שִׂפְתֵיהֶ֥ם תְּדַבֵּֽרְנָה: {ג} בְּ֭חָכְמָה יִבָּ֣נֶה בָּ֑יִת וּ֝בִתְבוּנָ֗ה יִתְכּוֹנָֽן: {ד} וּ֭בְדַעַת חֲדָרִ֣ים יִמָּלְא֑וּ כָּל-ה֖וֹן יָקָ֣ר וְנָעִֽים: {ה} גֶּֽבֶר-חָכָ֥ם בַּע֑וֹז וְאִֽישׁ-דַּ֝֗עַת מְאַמֶּץ-כֹּֽחַ: {ו} כִּ֣י בְ֭תַחְבֻּלוֹת תַּעֲשֶׂה-לְּךָ֣ מִלְחָמָ֑ה וּ֝תְשׁוּעָ֗ה בְּרֹ֣ב יוֹעֵֽץ: {ז} רָאמ֣וֹת לֶֽאֱוִ֣יל חָכְמ֑וֹת בַּ֝שַּׁ֗עַר לֹ֣א יִפְתַּח-פִּֽיהוּ: {ח} מְחַשֵּׁ֥ב לְהָרֵ֑עַ ל֝֗וֹ בַּֽעַל-מְזִמּ֥וֹת יִקְרָֽאוּ: {ט} זִמַּ֣ת אִוֶּ֣לֶת חַטָּ֑את וְתוֹעֲבַ֖ת לְאָדָ֣ם לֵֽץ: {י} הִ֭תְרַפִּיתָ בְּי֥וֹם צָרָ֗ה צַ֣ר כֹּחֶֽכָה: {יא} הַ֭צֵּל לְקֻחִ֣ים לַמָּ֑וֶת וּמָטִ֥ים לַ֝הֶ֗רֶג אִם-תַּחְשֽׂוֹךְ: {יב} כִּֽי-תֹאמַ֗ר הֵן֮ לֹא-יָדַ֪עְנ֫וּ זֶ֥ה הֲֽלֹא-תֹ֘כֵ֤ן לִבּ֨וֹת | הֽוּא-יָבִ֗ין וְנֹצֵ֣ר נַ֭פְשְׁךָ ה֣וּא יֵדָ֑ע וְהֵשִׁ֖יב לְאָדָ֣ם כְּפָעֳלֽוֹ: {יג} אֱכָל-בְּנִ֣י דְבַ֣שׁ כִּי-ט֑וֹב וְנֹ֥פֶת מָ֝ת֗וֹק עַל-חִכֶּֽךָ: {יד} כֵּ֤ן | דְּעֶ֥ה חָכְמָ֗ה לְנַ֫פְשֶׁ֥ךָ אִם-מָ֭צָאתָ וְיֵ֣שׁ אַחֲרִ֑ית וְ֝תִקְוָתְךָ֗ לֹ֣א תִכָּרֵֽת: {טו} אַל-תֶּאֱרֹ֣ב רָ֭שָׁע לִנְוֵ֣ה צַדִּ֑יק אַֽל-תְּשַׁדֵּ֥ד רִבְצֽוֹ: {טז} כִּ֤י שֶׁ֨בַע | יִפּ֣וֹל צַדִּ֣יק וָקָ֑ם וּ֝רְשָׁעִ֗ים יִכָּשְׁל֥וּ בְרָעָֽה: {יז} בִּנְפֹ֣ל (אויביך) אֽ֭וֹיִבְךָ אַל-תִּשְׂמָ֑ח וּ֝בִכָּשְׁל֗וֹ אַל-יָגֵ֥ל לִבֶּֽךָ: {יח} פֶּן-יִרְאֶ֣ה יְ֭הוָה וְרַ֣ע בְּעֵינָ֑יו וְהֵשִׁ֖יב מֵעָלָ֣יו אַפּֽוֹ: {יט} אַל-תִּתְחַ֥ר בַּמְּרֵעִ֑ים אַל-תְּ֝קַנֵּ֗א בָּרְשָׁעִֽים: {כ} כִּ֤י | לֹֽא-תִהְיֶ֣ה אַחֲרִ֣ית לָרָ֑ע נֵ֖ר רְשָׁעִ֣ים יִדְעָֽךְ: {כא} יְרָֽא-אֶת-יְהוָ֣ה בְּנִ֣י וָמֶ֑לֶךְ עִם-שׁ֝וֹנִ֗ים אַל-תִּתְעָרָֽב: {כב} כִּֽי-פִ֭תְאֹם יָק֣וּם אֵידָ֑ם וּפִ֥יד שְׁ֝נֵיהֶ֗ם מִ֣י יוֹדֵֽעַ: {כג} גַּם-אֵ֥לֶּה לַֽחֲכָמִ֑ים הַֽכֵּר-פָּנִ֖ים בְּמִשְׁפָּ֣ט בַּל-טֽוֹב: {כד} אֹ֤מֵ֨ר | לְרָשָׁע֮ צַדִּ֪יק אָ֥תָּה יִקְּבֻ֥הוּ עַמִּ֑ים יִזְעָמ֥וּהוּ לְאֻמִּֽים: {כה} וְלַמּוֹכִיחִ֥ים יִנְעָ֑ם וַֽ֝עֲלֵיהֶ֗ם תָּב֥וֹא בִרְכַּת-טֽוֹב: {כו} שְׂפָתַ֥יִם יִשָּׁ֑ק מֵ֝שִׁ֗יב דְּבָרִ֥ים נְכֹחִֽים: {כז} הָ֘כֵ֤ן בַּח֨וּץ | מְלַאכְתֶּ֗ךָ וְעַתְּדָ֣הּ בַּשָּׂדֶ֣ה לָ֑ךְ אַ֝חַ֗ר וּבָנִ֥יתָ בֵיתֶֽךָ: {כח} אַל-תְּהִ֣י עֵד-חִנָּ֣ם בְּרֵעֶ֑ךָ וַ֝הֲפִתִּ֗יתָ בִּשְׂפָתֶֽיךָ: {כט} אַל-תֹּאמַ֗ר כַּאֲשֶׁ֣ר עָֽשָׂה-לִ֭י כֵּ֤ן אֶֽעֱשֶׂה-לּ֑וֹ אָשִׁ֖יב לָאִ֣ישׁ כְּפָעֳלֽוֹ: {ל} עַל-שְׂדֵ֣ה אִישׁ-עָצֵ֣ל עָבַ֑רְתִּי וְעַל-כֶּ֝֗רֶם אָדָ֥ם חֲסַר-לֵֽב: {לא} וְהִנֵּ֨ה עָ֘לָ֤ה כֻלּ֨וֹ | קִמְּשֹׂנִ֗ים כָּסּ֣וּ פָנָ֣יו חֲרֻלִּ֑ים וְגֶ֖דֶר אֲבָנָ֣יו נֶהֱרָֽסָה: {לב} וָֽאֶחֱזֶ֣ה אָ֭נֹכִֽי אָשִׁ֣ית לִבִּ֑י רָ֝אִ֗יתִי לָקַ֥חְתִּי מוּסָֽר: {לג} מְעַ֣ט שֵׁ֭נוֹת מְעַ֣ט תְּנוּמ֑וֹת מְעַ֓ט | חִבֻּ֖ק יָדַ֣יִם לִשְׁכָּֽב: {לד} וּבָֽא-מִתְהַלֵּ֥ךְ רֵישֶׁ֑ךָ וּ֝מַחְסֹרֶ֗יךָ כְּאִ֣ישׁ מָגֵֽן:

משלי פרק-כה

{א} גַּם-אֵ֭לֶּה מִשְׁלֵ֣י שְׁלֹמֹ֑ה אֲשֶׁ֥ר הֶ֝עְתִּ֗יקוּ אַנְשֵׁ֤י | חִזְקִיָּ֬ה מֶֽלֶךְ-יְהוּדָֽה: {ב} כְּבֹ֣ד אֱ֭לֹהִים הַסְתֵּ֣ר דָּבָ֑ר וּכְבֹ֥ד מְ֝לָכִ֗ים חֲקֹ֣ר דָּבָֽר: {ג} שָׁמַ֣יִם לָ֭רוּם וָאָ֣רֶץ לָעֹ֑מֶק וְלֵ֥ב מְ֝לָכִ֗ים אֵ֣ין חֵֽקֶר: {ד} הָג֣וֹ סִיגִ֣ים מִכָּ֑סֶף וַיֵּצֵ֖א לַצֹּרֵ֣ף כֶּֽלִי: {ה} הָג֣וֹ רָ֭שָׁע לִפְנֵי-מֶ֑לֶךְ וְיִכּ֖וֹן בַּצֶּ֣דֶק כִּסְאֽוֹ: {ו} אַל-תִּתְהַדַּ֥ר לִפְנֵי-מֶ֑לֶךְ וּבִמְק֥וֹם גְּ֝דֹלִ֗ים אַֽל-תַּעֲמֹֽד: {ז} כִּ֤י ט֥וֹב אֲמָר-לְךָ֗ עֲֽלֵ֫ה הֵ֥נָּה מֵֽ֭הַשְׁפִּ֣ילְךָ לִפְנֵ֣י נָדִ֑יב אֲשֶׁ֖ר רָא֣וּ עֵינֶֽיךָ: {ח} אַל-תֵּצֵ֥א לָרִ֗ב מַ֫הֵ֥ר פֶּ֣ן מַה-תַּ֭עֲשֶׂה בְּאַחֲרִיתָ֑הּ בְּהַכְלִ֖ים אֹתְךָ֣ רֵעֶֽךָ: {ט} רִֽ֭יבְךָ רִ֣יב אֶת-רֵעֶ֑ךָ וְס֖וֹד אַחֵ֣ר אַל-תְּגָֽל: {י} פֶּֽן-יְחַסֶּדְךָ֥ שֹׁמֵ֑עַ וְ֝דִבָּתְךָ֗ לֹ֣א תָשֽׁוּב: {יא} תַּפּוּחֵ֣י זָ֭הָב בְּמַשְׂכִּיּ֥וֹת כָּ֑סֶף דָּ֝בָ֗ר דָּבֻ֥ר עַל-אָפְנָֽיו: {יב} נֶ֣זֶם זָ֭הָב וַחֲלִי-כָ֑תֶם מוֹכִ֥יחַ חָ֝כָ֗ם עַל-אֹ֥זֶן שֹׁמָֽעַת: {יג} כְּצִנַּת-שֶׁ֨לֶג | בְּי֬וֹם קָצִ֗יר צִ֣יר נֶ֭אֱמָן לְשֹׁלְחָ֑יו וְנֶ֖פֶשׁ אֲדֹנָ֣יו יָשִֽׁיב: {יד} נְשִׂיאִ֣ים וְ֭רוּחַ וְגֶ֣שֶׁם אָ֑יִן אִ֥ישׁ מִ֝תְהַלֵּ֗ל בְּמַתַּת-שָֽׁקֶר: {טו} בְּאֹ֣רֶךְ אַ֭פַּיִם יְפֻתֶּ֣ה קָצִ֑ין וְלָשׁ֥וֹן רַ֝כָּ֗ה תִּשְׁבָּר-גָּֽרֶם: {טז} דְּבַ֣שׁ מָ֭צָאתָ אֱכֹ֣ל דַּיֶּ֑ךָּ פֶּן-תִּ֝שְׂבָּעֶ֗נּוּ וַהֲקֵֽאתֽוֹ: {יז} הֹקַ֣ר רַ֭גְלְךָ מִבֵּ֣ית רֵעֶ֑ךָ פֶּן-יִ֝שְׂבָּעֲךָ֗ וּשְׂנֵאֶֽךָ: {יח} מֵפִ֣יץ וְ֭חֶרֶב וְחֵ֣ץ שָׁנ֑וּן אִ֥ישׁ עֹנֶ֥ה בְ֝רֵעֵ֗הוּ עֵ֣ד שָֽׁקֶר: {יט} שֵׁ֣ן רֹ֭עָה וְרֶ֣גֶל מוּעָ֑דֶת מִבְטָ֥ח בּ֝וֹגֵ֗ד בְּי֣וֹם צָרָֽה: {כ} מַ֥עֲדֶה בֶּ֨גֶד | בְּי֣וֹם קָ֭רָה חֹ֣מֶץ עַל-נָ֑תֶר וְשָׁ֥ר בַּ֝שִּׁרִ֗ים עַ֣ל לֶב-רָֽע: {כא} אִם-רָעֵ֣ב שֹׂ֭נַאֲךָ הַאֲכִלֵ֣הוּ לָ֑חֶם וְאִם-צָ֝מֵ֗א הַשְׁקֵ֥הוּ מָֽיִם: {כב} כִּ֤י גֶֽחָלִ֗ים אַ֭תָּה חֹתֶ֣ה עַל-רֹאשׁ֑וֹ וַֽ֝יהוָ֗ה יְשַׁלֶּם-לָֽךְ: {כג} ר֣וּחַ צָ֭פוֹן תְּח֣וֹלֵֽל גָּ֑שֶׁם וּפָנִ֥ים נִ֝זְעָמִ֗ים לְשׁ֣וֹן סָֽתֶר: {כד} ט֗וֹב שֶׁ֥בֶת עַל-פִּנַּת-גָּ֑ג מֵאֵ֥שֶׁת (מדונים) מִ֝דְיָנִ֗ים וּבֵ֥ית חָֽבֶר: {כה} מַ֣יִם קָ֭רִים עַל-נֶ֣פֶשׁ עֲיֵפָ֑ה וּשְׁמוּעָ֥ה ט֝וֹבָ֗ה מֵאֶ֥רֶץ מֶרְחָֽק: {כו} מַעְיָ֣ן נִ֭רְפָּשׂ וּמָק֣וֹר מָשְׁחָ֑ת צַ֝דִּ֗יק מָ֣ט לִפְנֵֽי-רָשָֽׁע: {כז} אָ֘כֹ֤ל דְּבַ֣שׁ הַרְבּ֣וֹת לֹא-ט֑וֹב וְחֵ֖קֶר כְּבֹדָ֣ם כָּבֽוֹד: {כח} עִ֣יר פְּ֭רוּצָה אֵ֣ין חוֹמָ֑ה אִ֝֗ישׁ אֲשֶׁ֤ר אֵ֖ין מַעְצָ֣ר לְרוּחֽוֹ:

משלי פרק-כו

{א} כַּשֶּׁ֤לֶג | בַּקַּ֗יִץ וְכַמָּטָ֥ר בַּקָּצִ֑יר כֵּ֤ן לֹא-נָאוֶ֖ה לִכְסִ֣יל כָּבֽוֹד: {ב} כַּצִּפּ֣וֹר לָ֭נוּד כַּדְּר֣וֹר לָע֑וּף כֵּ֥ן קִֽלְלַ֥ת חִ֝נָּ֗ם (לא) ל֣וֹ תָבֹֽא: {ג} שׁ֣וֹט לַ֭סּוּס מֶ֣תֶג לַחֲמ֑וֹר וְ֝שֵׁ֗בֶט לְגֵ֣ו כְּסִילִֽים: {ד} אַל-תַּ֣עַן כְּ֭סִיל כְּאִוַּלְתּ֑וֹ פֶּֽן-תִּשְׁוֶה-לּ֥וֹ גַם-אָֽתָּה: {ה} עֲנֵ֣ה כְ֭סִיל כְּאִוַּלְתּ֑וֹ פֶּן-יִהְיֶ֖ה חָכָ֣ם בְּעֵינָֽיו: {ו} מְקַצֶּ֣ה רַ֭גְלַיִם חָמָ֣ס שֹׁתֶ֑ה שֹׁלֵ֖חַ דְּבָרִ֣ים בְּיַד-כְּסִֽיל: {ז} דַּלְי֣וּ שֹׁ֭קַיִם מִפִּסֵּ֑חַ וּ֝מָשָׁ֗ל בְּפִ֣י כְסִילִֽים: {ח} כִּצְר֣וֹר אֶ֭בֶן בְּמַרְגֵּמָ֑ה כֵּן-נוֹתֵ֖ן לִכְסִ֣יל כָּבֽוֹד: {ט} ח֭וֹחַ עָלָ֣ה בְיַד-שִׁכּ֑וֹר וּ֝מָשָׁ֗ל בְּפִ֣י כְסִילִֽים: {י} רַ֥ב מְחֽוֹלֵֽל-כֹּ֑ל וְשֹׂכֵ֥ר כְּ֝סִ֗יל וְשֹׂכֵ֥ר עֹבְרִֽים: {יא} כְּ֭כֶלֶב שָׁ֣ב עַל-קֵא֑וֹ כְּ֝סִ֗יל שׁוֹנֶ֥ה בְאִוַּלְתּֽוֹ: {יב} רָאִ֗יתָ אִ֭ישׁ חָכָ֣ם בְּעֵינָ֑יו תִּקְוָ֖ה לִכְסִ֣יל מִמֶּֽנּוּ: {יג} אָמַ֣ר עָ֭צֵל שַׁ֣חַל בַּדָּ֑רֶךְ אֲ֝רִ֗י בֵּ֣ין הָרְחֹבֽוֹת: {יד} הַ֭דֶּלֶת תִּסּ֣וֹב עַל-צִירָ֑הּ וְ֝עָצֵ֗ל עַל-מִטָּתֽוֹ: {טו} טָ֘מַ֤ן עָצֵ֣ל יָ֭דוֹ בַּצַּלָּ֑חַת נִ֝לְאָ֗ה לַֽהֲשִׁיבָ֥הּ אֶל-פִּֽיו: {טז} חָכָ֣ם עָצֵ֣ל בְּעֵינָ֑יו מִ֝שִּׁבְעָ֗ה מְשִׁ֣יבֵי טָֽעַם: {יז} מַחֲזִ֥יק בְּאָזְנֵי-כָ֑לֶב עֹבֵ֥ר מִ֝תְעַבֵּ֗ר עַל-רִ֥יב לֹּֽא-לֽוֹ: {יח} כְּֽ֭מִתְלַהְלֵהַּ הַיֹּרֶ֥ה זִקִּ֗ים חִצִּ֥ים וָמָֽוֶת: {יט} כֵּֽן-אִ֭ישׁ רִמָּ֣ה אֶת-רֵעֵ֑הוּ וְ֝אָמַ֗ר הֲֽלֹא-מְשַׂחֵ֥ק אָֽנִי: {כ} בְּאֶ֣פֶס עֵ֭צִים תִּכְבֶּה-אֵ֑שׁ וּבְאֵ֥ין נִ֝רְגָּ֗ן יִשְׁתֹּ֥ק מָדֽוֹן: {כא} פֶּחָ֣ם לְ֭גֶחָלִים וְעֵצִ֣ים לְאֵ֑שׁ וְאִ֥ישׁ (מדונים) מִ֝דְיָנִ֗ים לְחַרְחַר-רִֽיב: {כב} דִּבְרֵ֣י נִ֭רְגָּן כְּמִֽתְלַהֲמִ֑ים וְ֝הֵ֗ם יָרְד֥וּ חַדְרֵי-בָֽטֶן: {כג} כֶּ֣סֶף סִ֭יגִים מְצֻפֶּ֣ה עַל-חָ֑רֶשׂ שְׂפָתַ֖יִם דֹּלְקִ֣ים וְלֶב-רָֽע: {כד} (בשפתו) בִּ֭שְׂפָתָיו יִנָּכֵ֣ר שׂוֹנֵ֑א וּ֝בְקִרְבּ֗וֹ יָשִׁ֥ית מִרְמָֽה: {כה} כִּֽי-יְחַנֵּ֣ן ק֭וֹלוֹ אַל-תַּֽאֲמֶן-בּ֑וֹ כִּ֤י שֶׁ֖בַע תּוֹעֵב֣וֹת בְּלִבּֽוֹ: {כו} תִּכַּסֶּ֣ה שִׂ֭נְאָה בְּמַשָּׁא֑וֹן תִּגָּלֶ֖ה רָעָת֣וֹ בְקָהָֽל: {כז} כֹּֽרֶה-שַּׁ֭חַת בָּ֣הּ יִפֹּ֑ל וְגֹ֥לֵ֥ל אֶ֝בֶן אֵלָ֥יו תָּשֽׁוּב: {כח} לְֽשׁוֹן-שֶׁ֭קֶר יִשְׂנָ֣א דַכָּ֑יו וּפֶ֥ה חָ֝לָ֗ק יַעֲשֶׂ֥ה מִדְחֶֽה:

משלי פרק-כז

{א} אַֽל-תִּ֭תְהַלֵּל בְּי֣וֹם מָחָ֑ר כִּ֤י לֹא-תֵ֝דַ֗ע מַה-יֵּ֥לֶד יֽוֹם: {ב} יְהַלֶּלְךָ֣ זָ֣ר וְלֹא-פִ֑יךָ נָ֝כְרִ֗י וְאַל-שְׂפָתֶֽיךָ: {ג} כֹּֽבֶד-אֶ֭בֶן וְנֵ֣טֶל הַח֑וֹל וְכַ֥עַס אֱ֝וִ֗יל כָּבֵ֥ד מִשְּׁנֵיהֶֽם: {ד} אַכְזְרִיּ֣וּת חֵ֭מָה וְשֶׁ֣טֶף אָ֑ף וּמִ֥י יַ֝עֲמֹד לִפְנֵ֥י קִנְאָֽה: {ה} ט֖וֹבָה תּוֹכַ֣חַת מְגֻלָּ֑ה מֵֽאַהֲבָ֥ה מְסֻתָּֽרֶת: {ו} נֶ֭אֱמָנִים פִּצְעֵ֣י אוֹהֵ֑ב וְ֝נַעְתָּר֗וֹת נְשִׁיק֥וֹת שׂוֹנֵֽא: {ז} נֶ֣פֶשׁ שְׂ֭בֵעָה תָּב֣וּס נֹ֑פֶת וְנֶ֥פֶשׁ רְ֝עֵבָ֗ה כָּל-מַ֥ר מָתֽוֹק: {ח} כְּ֭צִפּוֹר נוֹדֶ֣דֶת מִן-קִנָּ֑הּ כֵּֽן-אִ֝֗ישׁ נוֹדֵ֥ד מִמְּקוֹמֽוֹ: {ט} שֶׁ֣מֶן וּ֭קְטֹרֶת יְשַׂמַּֽח-לֵ֑ב וּמֶ֥תֶק רֵ֝עֵ֗הוּ מֵֽעֲצַת-נָֽפֶשׁ: {י} רֵֽעֲךָ֙ (ורעה) וְרֵ֪עַ אָבִ֡יךָ אַֽל-תַּעֲזֹ֗ב וּבֵ֥ית אָחִ֗יךָ אַל-תָּ֭בוֹא בְּי֣וֹם אֵידֶ֑ךָ ט֥וֹב שָׁכֵ֥ן קָ֝ר֗וֹב מֵאָ֥ח רָחֽוֹק: {יא} חֲכַ֣ם בְּ֭נִי וְשַׂמַּ֣ח לִבִּ֑י וְאָשִׁ֖יבָה חֹרְפִ֣י דָבָֽר: {יב} עָר֤וּם רָאָ֣ה רָעָ֣ה נִסְתָּ֑ר פְּ֝תָאיִ֗ם עָבְר֥וּ נֶעֱנָֽשׁוּ: {יג} קַח-בִּ֭גְדוֹ כִּי-עָ֣רַב זָ֑ר וּבְעַ֖ד נָכְרִיָּ֣ה חַבְלֵֽהוּ: {יד} מְבָ֘רֵ֤ךְ רֵעֵ֨הוּ | בְּק֣וֹל גָּ֭דוֹל בַּבֹּ֣קֶר הַשְׁכֵּ֑ים קְ֝לָלָ֗ה תֵּחָ֥שֶׁב לֽוֹ: {טו} דֶּ֣לֶף ט֭וֹרֵד בְּי֣וֹם סַגְרִ֑יר וְאֵ֥שֶׁת (מדונים) מִ֝דְיָנִ֗ים נִשְׁתָּוָֽה: {טז} צֹפְנֶ֥יהָ צָֽפַן-ר֑וּחַ וְשֶׁ֖מֶן יְמִינ֣וֹ יִקְרָֽא: {יז} בַּרְזֶ֣ל בְּבַרְזֶ֣ל יָ֑חַד וְ֝אִ֗ישׁ יַ֣חַד פְּנֵֽי-רֵעֵֽהוּ: {יח} נֹצֵ֣ר תְּ֭אֵנָה יֹאכַ֣ל פִּרְיָ֑הּ וְשֹׁמֵ֖ר אֲדֹנָ֣יו יְכֻבָּֽד: {יט} כַּ֭מַּיִם הַפָּנִ֣ים לַפָּנִ֑ים כֵּ֤ן לֵֽב-הָ֝אָדָ֗ם לָאָדָֽם: {כ} שְׁא֣וֹל (ואבדה) וַ֭אֲבַדּוֹ לֹ֣א תִשְׂבַּ֑עְנָה וְעֵינֵ֥י הָ֝אָדָ֗ם לֹ֣א תִשְׂבַּֽעְנָה: {כא} מַצְרֵ֣ף לַ֭כֶּסֶף וְכ֣וּר לַזָּהָ֑ב וְ֝אִ֗ישׁ לְפִ֣י מַהֲלָלֽוֹ: {כב} אִ֥ם תִּכְתּֽוֹשׁ-אֶת-הָאֱוִ֨יל | בַּֽמַּכְתֵּ֡שׁ בְּת֣וֹךְ הָ֭רִיפוֹת בַּֽעֱלִ֑י לֹא-תָס֥וּר מֵ֝עָלָ֗יו אִוַּלְתּֽוֹ: {כג} יָדֹ֣עַ תֵּ֭דַע פְּנֵ֣י צֹאנֶ֑ךָ שִׁ֥ית לִ֝בְּךָ֗ לַעֲדָרִֽים: {כד} כִּ֤י לֹ֣א לְעוֹלָ֣ם חֹ֑סֶן וְאִם-נֵ֝֗זֶר לְד֣וֹר (דור) וָדֽוֹר: {כה} גָּלָ֣ה חָ֭צִיר וְנִרְאָה-דֶ֑שֶׁא וְ֝נֶאֶסְפ֗וּ עִשְּׂב֥וֹת הָרִֽים: {כו} כְּבָשִׂ֥ים לִלְבוּשֶׁ֑ךָ וּמְחִ֥יר שָׂ֝דֶ֗ה עַתּוּדִֽים: {כז} וְדֵ֤י | חֲלֵ֬ב עִזִּ֗ים לְֽ֭לַחְמְךָ לְלֶ֣חֶם בֵּיתֶ֑ךָ וְ֝חַיִּ֗ים לְנַעֲרוֹתֶֽיךָ:

משלי פרק-כח

{א} נָ֣סוּ וְאֵין-רֹדֵ֣ף רָשָׁ֑ע וְ֝צַדִּיקִ֗ים כִּכְפִ֥יר יִבְטָֽח: {ב} בְּפֶ֣שַֽׁע אֶ֭רֶץ רַבִּ֣ים שָׂרֶ֑יהָ וּבְאָדָ֥ם מֵבִ֥ין יֹ֝דֵ֗עַ כֵּ֣ן יַאֲרִֽיךְ: {ג} גֶּ֣בֶר רָ֭שׁ וְעֹשֵׁ֣ק דַּלִּ֑ים מָטָ֥ר סֹ֝חֵ֗ף וְאֵ֣ין לָֽחֶם: {ד} עֹזְבֵ֣י ת֭וֹרָה יְהַֽלְל֣וּ רָשָׁ֑ע וְשֹׁמְרֵ֥י ת֝וֹרָ֗ה יִתְגָּ֥רוּ בָֽם: {ה} אַנְשֵׁי-רָ֭ע לֹא-יָבִ֣ינוּ מִשְׁפָּ֑ט וּמְבַקְשֵׁ֥י יְ֝הוָ֗ה יָבִ֥ינוּ כֹֽל: {ו} טֽוֹב-רָ֭שׁ הוֹלֵ֣ךְ בְּתֻמּ֑וֹ מֵעִקֵּ֥שׁ דְּ֝רָכַ֗יִם וְה֣וּא עָשִֽׁיר: {ז} נוֹצֵ֣ר תּ֭וֹרָה בֵּ֣ן מֵבִ֑ין וְרֹעֶה זֽ֝וֹלְלִ֗ים יַכְלִ֥ים אָבִֽיו: {ח} מַרְבֶּ֣ה ה֭וֹנוֹ בְּנֶ֣שֶׁךְ (ובתרבית) וְתַרְבִּ֑ית לְחוֹנֵ֖ן דַּלִּ֣ים יִקְבְּצֶֽנּוּ: {ט} מֵסִ֣יר אָ֭זְנוֹ מִשְּׁמֹ֣עַ תּוֹרָ֑ה גַּֽם-תְּ֝פִלָּת֗וֹ תּוֹעֵבָֽה: {י} מַשְׁגֶּ֤ה יְשָׁרִ֨ים | בְּדֶ֥רֶךְ רָ֗ע בִּשְׁחוּת֥וֹ הֽוּא-יִפּ֑וֹל וּ֝תְמִימִ֗ים יִנְחֲלוּ-טֽוֹב: {יא} חָכָ֣ם בְּ֭עֵינָיו אִ֣ישׁ עָשִׁ֑יר וְדַ֖ל מֵבִ֣ין יַחְקְרֶֽנּוּ: {יב} בַּעֲלֹ֣ץ צַ֭דִּיקִים רַבָּ֣ה תִפְאָ֑רֶת וּבְק֥וּם רְ֝שָׁעִ֗ים יְחֻפַּ֥שׂ אָדָֽם: {יג} מְכַסֶּ֣ה פְ֭שָׁעָיו לֹ֣א יַצְלִ֑יחַ וּמוֹדֶ֖ה וְעֹזֵ֣ב יְרֻחָֽם: {יד} אַשְׁרֵ֣י אָ֭דָם מְפַחֵ֣ד תָּמִ֑יד וּמַקְשֶׁ֥ה לִ֝בּ֗וֹ יִפּ֥וֹל בְּרָעָֽה: {טו} אֲרִי-נֹ֭הֵם וְדֹ֣ב שׁוֹקֵ֑ק מֹשֵׁ֥ל רָ֝שָׁ֗ע עַ֣ל עַם-דָּֽל: {טז} נָגִ֗יד חֲסַ֣ר תְּ֭בוּנוֹת וְרַ֥ב מַעֲשַׁקּ֑וֹת (שנאי) שֹׂ֥נֵא בֶ֝֗צַע יַאֲרִ֥יךְ יָמִֽים: {יז} אָ֭דָם עָשֻׁ֣ק בְּדַם-נָ֑פֶשׁ עַד-בּ֥וֹר יָ֝נ֗וּס אַל-יִתְמְכוּ-בֽוֹ: {יח} הוֹלֵ֣ךְ תָּ֭מִים יִוָּשֵׁ֑עַ וְנֶעְקַ֥שׁ דְּ֝רָכַ֗יִם יִפּ֥וֹל בְּאֶחָֽת: {יט} עֹבֵ֣ד אַ֭דְמָתוֹ יִֽשְׂבַּֽע-לָ֑חֶם וּמְרַדֵּ֥ף רֵ֝קִ֗ים יִֽשְׂבַּֽע-רִֽישׁ: {כ} אִ֣ישׁ אֱ֭מוּנוֹת רַב-בְּרָכ֑וֹת וְאָ֥ץ לְ֝הַעֲשִׁ֗יר לֹ֣א יִנָּקֶֽה: {כא} הַֽכֵּר-פָּנִ֥ים לֹא-ט֑וֹב וְעַל-פַּת-לֶ֝֗חֶם יִפְשַׁע-גָּֽבֶר: {כב} נִֽבֳהָ֥ל לַה֗וֹן אִ֭ישׁ רַ֣ע עָ֑יִן וְלֹֽא-יֵ֝דַע כִּי-חֶ֥סֶר יְבֹאֶֽנּוּ: {כג} מ֘וֹכִ֤יחַ אָדָ֣ם אַ֭חֲרַי חֵ֣ן יִמְצָ֑א מִֽמַּחֲלִ֥יק לָשֽׁוֹן: {כד} גּוֹזֵ֤ל | אָ֘בִ֤יו וְאִמּ֗וֹ וְאֹמֵ֥ר אֵֽין-פָּ֑שַׁע חָבֵ֥ר ה֝֗וּא לְאִ֣ישׁ מַשְׁחִֽית: {כה} רְחַב-נֶ֭פֶשׁ יְגָרֶ֣ה מָד֑וֹן וּבוֹטֵ֖חַ עַל-יְהוָ֣ה יְדֻשָּֽׁן: {כו} בּוֹטֵ֣חַ בְּ֭לִבּוֹ ה֣וּא כְסִ֑יל וְהוֹלֵ֥ךְ בְּ֝חָכְמָ֗ה ה֣וּא יִמָּלֵֽט: {כז} נוֹתֵ֣ן לָ֭רָשׁ אֵ֣ין מַחְס֑וֹר וּמַעְלִ֥ים עֵ֝ינָ֗יו רַב-מְאֵרֽוֹת: {כח} בְּק֣וּם רְ֭שָׁעִים יִסָּתֵ֣ר אָדָ֑ם וּ֝בְאָבְדָ֗ם יִרְבּ֥וּ צַדִּיקִֽים:

משלי פרק-כט

{א} אִ֣ישׁ תּ֭וֹכָחוֹת מַקְשֶׁה-עֹ֑רֶף פֶּ֥תַע יִ֝שָּׁבֵ֗ר וְאֵ֣ין מַרְפֵּֽא: {ב} בִּרְב֣וֹת צַ֭דִּיקִים יִשְׂמַ֣ח הָעָ֑ם וּבִמְשֹׁ֥ל רָ֝שָׁ֗ע יֵאָ֥נַֽח עָֽם: {ג} אִֽישׁ-אֹהֵ֣ב חָ֭כְמָה יְשַׂמַּ֣ח אָבִ֑יו וְרֹעֶ֥ה ז֝וֹנ֗וֹת יְאַבֶּד-הֽוֹן: {ד} מֶ֗לֶךְ בְּ֭מִשְׁפָּט יַעֲמִ֣יד אָ֑רֶץ וְאִ֖ישׁ תְּרוּמ֣וֹת יֶֽהֶרְסֶֽנָּה: {ה} גֶּ֭בֶר מַחֲלִ֣יק עַל-רֵעֵ֑הוּ רֶ֝֗שֶׁת פּוֹרֵ֥שׂ עַל-פְּעָמָֽיו: {ו} בְּפֶ֤שַֽׁע אִ֣ישׁ רָ֣ע מוֹקֵ֑שׁ וְ֝צַדִּ֗יק יָר֥וּן וְשָׂמֵֽחַ: {ז} יֹדֵ֣עַ צַ֭דִּיק דִּ֣ין דַּלִּ֑ים רָ֝שָׁ֗ע לֹא-יָבִ֥ין דָּֽעַת: {ח} אַנְשֵׁ֣י לָ֭צוֹן יָפִ֣יחוּ קִרְיָ֑ה וַ֝חֲכָמִ֗ים יָשִׁ֥יבוּ אָֽף: {ט} אִֽישׁ-חָכָ֗ם נִ֭שְׁפָּט אֶת-אִ֣ישׁ אֱוִ֑יל וְרָגַ֥ז וְ֝שָׂחַ֗ק וְאֵ֣ין נָֽחַת: {י} אַנְשֵׁ֣י דָ֭מִים יִשְׂנְאוּ-תָ֑ם וִֽ֝ישָׁרִ֗ים יְבַקְשׁ֥וּ נַפְשֽׁוֹ: {יא} כָּל-ר֭וּחוֹ יוֹצִ֣יא כְסִ֑יל וְ֝חָכָ֗ם בְּאָח֥וֹר יְשַׁבְּחֶֽנָּה: {יב} מֹ֭שֵׁל מַקְשִׁ֣יב עַל-דְּבַר-שָׁ֑קֶר כָּֽל-מְשָׁרְתָ֥יו רְשָׁעִֽים: {יג} רָ֤שׁ וְאִ֣ישׁ תְּכָכִ֣ים נִפְגָּ֑שׁוּ מֵ֤אִיר-עֵינֵ֖י שְׁנֵיהֶ֣ם יְהוָֽה: {יד} מֶ֤לֶךְ שׁוֹפֵ֣ט בֶּֽאֱמֶ֣ת דַּלִּ֑ים כִּ֝סְא֗וֹ לָעַ֥ד יִכּֽוֹן: {טו} שֵׁ֣בֶט וְ֭תוֹכַחַת יִתֵּ֣ן חָכְמָ֑ה וְנַ֥עַר מְ֝שֻׁלָּ֗ח מֵבִ֥ישׁ אִמּֽוֹ: {טז} בִּרְב֣וֹת רְ֭שָׁעִים יִרְבֶּה-פָּ֑שַׁע וְ֝צַדִּיקִ֗ים בְּֽמַפַּלְתָּ֥ם יִרְאֽוּ: {יז} יַסֵּ֣ר בִּ֭נְךָ וִֽינִיחֶ֑ךָ וְיִתֵּ֖ן מַעֲדַנִּ֣ים לְנַפְשֶֽׁךָ: {יח} בְּאֵ֣ין חָ֭זוֹן יִפָּ֣רַֽע עָ֑ם וְשֹׁמֵ֖ר תּוֹרָ֣ה אַשְׁרֵֽהוּ: {יט} בִּ֭דְבָרִים לֹא-יִוָּ֣סֶר עָ֑בֶד כִּֽי-יָ֝בִ֗ין וְאֵ֣ין מַעֲנֶֽה: {כ} חָזִ֗יתָ אִ֭ישׁ אָ֣ץ בִּדְבָרָ֑יו תִּקְוָ֖ה לִכְסִ֣יל מִמֶּֽנּוּ: {כא} מְפַנֵּ֣ק מִנֹּ֣עַר עַבְדּ֑וֹ וְ֝אַחֲרִית֗וֹ יִהְיֶ֥ה מָנֽוֹן: {כב} אִֽישׁ-אַ֭ף יְגָרֶ֣ה מָד֑וֹן וּבַ֖עַל חֵמָ֣ה רַב-פָּֽשַׁע: {כג} גַּאֲוַ֣ת אָ֭דָם תַּשְׁפִּילֶ֑נּוּ וּשְׁפַל-ר֝֗וּחַ יִתְמֹ֥ךְ כָּבֽוֹד: {כד} חוֹלֵ֣ק עִם-גַּ֭נָּב שׂוֹנֵ֣א נַפְשׁ֑וֹ אָלָ֥ה יִ֝שְׁמַ֗ע וְלֹ֣א יַגִּֽיד: {כה} חֶרְדַּ֣ת אָ֭דָם יִתֵּ֣ן מוֹקֵ֑שׁ וּבוֹטֵ֖חַ בַּיהוָ֣ה יְשֻׂגָּֽב: {כו} רַ֭בִּים מְבַקְשִׁ֣ים פְּנֵי-מוֹשֵׁ֑ל וּ֝מֵיְהוָ֗ה מִשְׁפַּט-אִֽישׁ: {כז} תּוֹעֲבַ֣ת צַ֭דִּיקִים אִ֣ישׁ עָ֑וֶל וְתוֹעֲבַ֖ת רָשָׁ֣ע יְשַׁר-דָּֽרֶךְ:

משלי פרק-ל

{א} דִּבְרֵ֤י | אָג֥וּר בִּן-יָקֶ֗ה הַמַּ֫שָּׂ֥א נְאֻ֣ם הַ֭גֶּבֶר לְאִֽיתִיאֵ֑ל לְאִ֖יתִיאֵ֣ל וְאֻכָֽל: {ב} כִּ֤י בַ֣עַר אָנֹכִ֣י מֵאִ֑ישׁ וְלֹֽא-בִינַ֖ת אָדָ֣ם לִֽי: {ג} וְלֹֽא-לָמַ֥דְתִּי חָכְמָ֑ה וְדַ֖עַת קְדֹשִׁ֣ים אֵדָֽע: {ד} מִ֤י עָלָֽה-שָׁמַ֨יִם | וַיֵּרַ֡ד מִ֤י אָֽסַף-ר֨וּחַ | בְּחָפְנָ֡יו מִ֤י צָֽרַר-מַ֨יִם | בַּשִּׂמְלָ֗ה מִ֭י הֵקִ֣ים כָּל-אַפְסֵי-אָ֑רֶץ מַה-שְּׁמ֥וֹ וּמַֽה-שֶּׁם-בְּ֝נ֗וֹ כִּ֣י תֵדָֽע: {ה} כָּל-אִמְרַ֣ת אֱל֣וֹהַּ צְרוּפָ֑ה מָגֵ֥ן ה֝֗וּא לַֽחֹסִ֥ים בּֽוֹ: {ו} אַל-תּ֥וֹסְףְּ עַל-דְּבָרָ֑יו פֶּן-יוֹכִ֖יחַ בְּךָ֣ וְנִכְזָֽבְתָּ: {ז} שְׁ֭תַּיִם שָׁאַ֣לְתִּי מֵאִתָּ֑ךְ אַל-תִּמְנַ֥ע מִ֝מֶּ֗נִּי בְּטֶ֣רֶם אָמֽוּת: {ח} שָׁ֤וְא | וּֽדְבַר-כָּזָ֡ב הַרְחֵ֬ק מִמֶּ֗נִּי רֵ֣אשׁ וָ֭עֹשֶׁר אַל-תִּֽתֶּן-לִ֑י הַ֝טְרִיפֵ֗נִי לֶ֣חֶם חֻקִּֽי: {ט} פֶּ֥ן אֶשְׂבַּ֨ע | וְכִחַשְׁתִּי֮ וְאָמַ֗רְתִּי מִ֥י יְה֫וָ֥ה וּפֶֽן-אִוָּרֵ֥שׁ וְגָנַ֑בְתִּי וְ֝תָפַ֗שְׂתִּי שֵׁ֣ם אֱלֹהָֽי: {י} אַל-תַּלְשֵׁ֣ן עֶ֭בֶד אֶל-(אדנו) אֲדֹנָ֑יו פֶּֽן-יְקַלֶּלְךָ֥ וְאָשָֽׁמְתָּ: {יא} דּ֭וֹר אָבִ֣יו יְקַלֵּ֑ל וְאֶת-אִ֝מּ֗וֹ לֹ֣א יְבָרֵֽךְ: {יב} דּ֭וֹר טָה֣וֹר בְּעֵינָ֑יו וּ֝מִצֹּאָת֗וֹ לֹ֣א רֻחָֽץ: {יג} דּ֭וֹר מָה-רָמ֣וּ עֵינָ֑יו וְ֝עַפְעַפָּ֗יו יִנָּשֵֽׂאוּ: {יד} דּ֤וֹר | חֲרָב֣וֹת שִׁנָּיו֮ וּֽמַאֲכָל֪וֹת מְֽתַלְּעֹ֫תָ֥יו לֶאֱכֹ֣ל עֲנִיִּ֣ים מֵאֶ֑רֶץ וְ֝אֶבְיוֹנִ֗ים מֵאָדָֽם: {טו} לַֽעֲלוּקָ֨ה | שְׁתֵּ֥י בָנוֹת֮ הַ֤ב | הַ֥ב שָׁל֣וֹשׁ הֵ֭נָּה לֹ֣א תִשְׂבַּ֑עְנָה אַ֝רְבַּ֗ע לֹא-אָ֥מְרוּ הֽוֹן: {טז} שְׁאוֹל֮ וְעֹ֪צֶ֫ר רָ֥חַם אֶ֭רֶץ לֹא-שָׂ֣בְעָה מַּ֑יִם וְ֝אֵ֗שׁ לֹא-אָ֥מְרָה הֽוֹן: {יז} עַ֤יִן | תִּֽלְעַ֣ג לְאָב֮ וְתָב֪וּז לִֽיקֲּהַ֫ת-אֵ֥ם יִקְּר֥וּהָ עֹרְבֵי-נַ֑חַל וְֽיֹאכְל֥וּהָ בְנֵי-נָֽשֶׁר: {יח} שְׁלֹשָׁ֣ה הֵ֭מָּה נִפְלְא֣וּ מִמֶּ֑נִּי (וארבע) וְ֝אַרְבָּעָ֗ה לֹ֣א יְדַעְתִּֽים: {יט} דֶּ֤רֶךְ הַנֶּ֨שֶׁר | בַּשָּׁמַיִם֮ דֶּ֥רֶךְ נָחָ֗שׁ עֲלֵ֫י צ֥וּר דֶּֽרֶךְ-אֳנִיָּ֥ה בְלֶב-יָ֑ם וְדֶ֖רֶךְ גֶּ֣בֶר בְּעַלְמָֽה: {כ} כֵּ֤ן | דֶּ֥רֶךְ אִשָּׁ֗ה מְנָ֫אָ֥פֶת אָ֭כְלָה וּמָ֣חֲתָה פִ֑יהָ וְ֝אָמְרָ֗ה לֹֽא-פָעַ֥לְתִּי אָֽוֶן: {כא} תַּ֣חַת שָׁ֭לוֹשׁ רָ֣גְזָה אֶ֑רֶץ וְתַ֥חַת אַ֝רְבַּ֗ע לֹא-תוּכַ֥ל שְׂאֵֽת: {כב} תַּֽחַת-עֶ֭בֶד כִּ֣י יִמְל֑וֹךְ וְ֝נָבָ֗ל כִּ֣י יִֽשְׂבַּֽע-לָֽחֶם: {כג} תַּ֣חַת שְׂ֭נוּאָה כִּ֣י תִבָּעֵ֑ל וְ֝שִׁפְחָ֗ה כִּֽי-תִירַ֥שׁ גְּבִרְתָּֽהּ: {כד} אַרְבָּ֣עָה הֵ֭ם קְטַנֵּי-אָ֑רֶץ וְ֝הֵ֗מָּה חֲכָמִ֥ים מְחֻכָּמִֽים: {כה} הַ֭נְּמָלִים עַ֣ם לֹא-עָ֑ז וַיָּכִ֖ינוּ בַקַּ֣יִץ לַחְמָֽם: {כו} שְׁ֭פַנִּים עַ֣ם לֹא-עָצ֑וּם וַיָּשִׂ֖ימוּ בַסֶּ֣לַע בֵּיתָֽם: {כז} מֶ֭לֶךְ אֵ֣ין לָאַרְבֶּ֑ה וַיֵּצֵ֖א חֹצֵ֣ץ כֻּלּֽוֹ: {כח} שְׂ֭מָמִית בְּיָדַ֣יִם תְּתַפֵּ֑שׂ וְ֝הִ֗יא בְּהֵ֣יכְלֵי מֶֽלֶךְ: {כט} שְׁלֹשָׁ֣ה הֵ֭מָּה מֵיטִ֣יבֵי צָ֑עַד וְ֝אַרְבָּעָ֗ה מֵיטִ֥בֵי לָֽכֶת: {ל} לַ֭יִשׁ גִּבּ֣וֹר בַּבְּהֵמָ֑ה וְלֹא-יָ֝שׁ֗וּב מִפְּנֵי-כֹֽל: {לא} זַרְזִ֣יר מָתְנַ֣יִם אוֹ-תָ֑יִשׁ וּ֝מֶ֗לֶךְ אַלְק֥וּם עִמּֽוֹ: {לב} אִם-נָבַ֥לְתָּ בְהִתְנַשֵּׂ֑א וְאִם-זַ֝מּ֗וֹתָ יָ֣ד לְפֶֽה: {לג} כִּ֤י מִ֪יץ חָלָ֡ב י֘וֹצִ֤יא חֶמְאָ֗ה וּֽמִיץ-אַ֭ף י֣וֹצִיא דָ֑ם וּמִ֥יץ אַ֝פַּ֗יִם י֣וֹצִיא רִֽיב:

משלי פרק-לא

{א} דִּ֭בְרֵי לְמוּאֵ֣ל מֶ֑לֶךְ מַ֝שָּׂ֗א אֲֽשֶׁר-יִסְּרַ֥תּוּ אִמּֽוֹ: {ב} מַה-בְּ֭רִי וּמַֽה-בַּר-בִּטְנִ֑י וּ֝מֶה בַּר-נְדָרָֽי: {ג} אַל-תִּתֵּ֣ן לַנָּשִׁ֣ים חֵילֶ֑ךָ וּ֝דְרָכֶ֗יךָ לַֽמְח֥וֹת מְלָכִֽין: {ד} אַ֤ל לַֽמְלָכִ֨ים | לְֽמוֹאֵ֗ל אַ֣ל לַֽמְלָכִ֣ים שְׁתוֹ-יָ֑יִן וּ֝לְרוֹזְנִ֗ים (או) אֵ֣י שֵׁכָֽר: {ה} פֶּן-יִ֭שְׁתֶּה וְיִשְׁכַּ֣ח מְחֻקָּ֑ק וִֽ֝ישַׁנֶּה דִּ֣ין כָּל-בְּנֵי-עֹֽנִי: {ו} תְּנוּ-שֵׁכָ֣ר לְאוֹבֵ֑ד וְ֝יַיִן לְמָ֣רֵי נָֽפֶשׁ: {ז} יִ֭שְׁתֶּה וְיִשְׁכַּ֣ח רִישׁ֑וֹ וַ֝עֲמָל֗וֹ לֹ֣א יִזְכָּר-עֽוֹד: {ח} פְּתַח-פִּ֥יךָ לְאִלֵּ֑ם אֶל-דִּ֝֗ין כָּל-בְּנֵ֥י חֲלֽוֹף: {ט} פְּתַח-פִּ֥יךָ שְׁפָט-צֶ֑דֶק וְ֝דִ֗ין עָנִ֥י וְאֶבְיֽוֹן: {י} אֵֽשֶׁת-חַ֭יִל מִ֣י יִמְצָ֑א וְרָחֹ֖ק מִפְּנִינִ֣ים מִכְרָֽהּ: {יא} בָּ֣טַח בָּ֭הּ לֵ֣ב בַּעְלָ֑הּ וְ֝שָׁלָ֗ל לֹ֣א יֶחְסָֽר: {יב} גְּמָלַ֣תְהוּ ט֣וֹב וְלֹא-רָ֑ע כֹּ֝֗ל יְמֵ֣י חַיֶּֽיה: {יג} דָּ֭רְשָׁה צֶ֣מֶר וּפִשְׁתִּ֑ים וַ֝תַּ֗עַשׂ בְּחֵ֣פֶץ כַּפֶּֽיהָ: {יד} הָ֭יְתָה כָּאֳנִיּ֣וֹת סוֹחֵ֑ר מִ֝מֶּרְחָ֗ק תָּבִ֥יא לַחְמָֽהּ: {טו} וַתָּ֤קָם | בְּע֬וֹד לַ֗יְלָה וַתִּתֵּ֣ן טֶ֣רֶף לְבֵיתָ֑הּ וְ֝חֹ֗ק לְנַעֲרֹתֶֽיהָ: {טז} זָמְמָ֣ה שָׂ֭דֶה וַתִּקָּחֵ֑הוּ מִפְּרִ֥י כַ֝פֶּ֗יהָ (נטע) נָ֣טְעָה כָּֽרֶם: {יז} חָֽגְרָ֣ה בְע֣וֹז מָתְנֶ֑יהָ וַ֝תְּאַמֵּ֗ץ זְרֹעוֹתֶֽיהָ: {יח} טָ֭עֲמָה כִּי-ט֣וֹב סַחְרָ֑הּ לֹֽא-יִכְבֶּ֖ה (בליל) בַלַּ֣יְלָה נֵרָֽהּ: {יט} יָ֭דֶיהָ שִׁלְּחָ֣ה בַכִּישׁ֑וֹר וְ֝כַפֶּ֗יהָ תָּ֣מְכוּ פָֽלֶךְ: {כ} כַּ֭פָּהּ פָּרְשָׂ֣ה לֶעָנִ֑י וְ֝יָדֶ֗יהָ שִׁלְּחָ֥ה לָֽאֶבְיֽוֹן: {כא} לֹא-תִירָ֣א לְבֵיתָ֣הּ מִשָּׁ֑לֶג כִּ֥י כָל-בֵּ֝יתָ֗הּ לָבֻ֥שׁ שָׁנִֽים: {כב} מַרְבַדִּ֥ים עָֽשְׂתָה-לָּ֑הּ שֵׁ֖שׁ וְאַרְגָּמָ֣ן לְבוּשָֽׁהּ: {כג} נוֹדָ֣ע בַּשְּׁעָרִ֣ים בַּעְלָ֑הּ בְּ֝שִׁבְתּ֗וֹ עִם-זִקְנֵי-אָֽרֶץ: {כד} סָדִ֣ין עָ֭שְׂתָה וַתִּמְכֹּ֑ר וַ֝חֲג֗וֹר נָתְנָ֥ה לַֽכְּנַעֲנִֽי: {כה} עֹז-וְהָדָ֥ר לְבוּשָׁ֑הּ וַ֝תִּשְׂחַ֗ק לְי֣וֹם אַחֲרֽוֹן: {כו} פִּ֭יהָ פָּתְחָ֣ה בְחָכְמָ֑ה וְתֽוֹרַת-חֶ֝֗סֶד עַל-לְשׁוֹנָֽהּ: {כז} צ֭וֹפִיָּה הֲלִיכ֣וֹת בֵּיתָ֑הּ וְלֶ֥חֶם עַ֝צְל֗וּת לֹ֣א תֹאכֵֽל: {כח} קָ֣מוּ בָ֭נֶיהָ וַֽיְאַשְּׁר֑וּהָ בַּ֝עְלָ֗הּ וַֽיְהַֽלְלָֽהּ: {כט} רַבּ֣וֹת בָּ֭נוֹת עָ֣שׂוּ חָ֑יִל וְ֝אַ֗תְּ עָלִ֥ית עַל-כֻּלָּֽנָה: {ל} שֶׁ֣קֶר הַ֭חֵן וְהֶ֣בֶל הַיֹּ֑פִי אִשָּׁ֥ה יִרְאַת-יְ֝הוָ֗ה הִ֣יא תִתְהַלָּֽל: {לא} תְּנוּ-לָ֭הּ מִפְּרִ֣י יָדֶ֑יהָ וִֽיהַלְל֖וּהָ בַשְּׁעָרִ֣ים מַעֲשֶֽׂיהָ: (פפפ)